Por Galicia Confidencial | SANTIAGO DE COMPOSTELA | 20/10/2021 | Actualizada ás 20:00
Continúa a lea legal no seo do Colexio de Médicos da Coruña. Unhas xornadas atrás, un xulgado da Coruña desestimou a demanda interposta por un dos facultativos contra as últimas eleccións celebradas, denuncian que se incumprira a normativa reitora do proceso electoral. A negativa do xuíz non vén de frear os intentos de parte do colexio, que aseguran que levarán ao TSXG o que consideran unha irregularidade no funcionamento interno da entidade.
As eleccións á presidencia do Colexio tiveron lugar hai agora dous anos, en outubro de 2019. Entón competín dúas candidaturas, das que unha --a de Abel Vázquez-- caeu pouco antes de celebrar os comicios. Xa entón denunciaron irregularidades na proclamación das candidaturas, “contravindo o previamente establecido” polo Pleno da Xunta Directiva.
Porén, a xustiza pensou entón que, ao non presentarse efectivamente ás eleccións, esas irregularidades non tomaron forma, xa que a única candidatura recollida pola xustiza foi a de Luciano Vidán, que repetiría á cabeza do Colexio. É dicir, que ao non darse un auténtico concurso electoral, non se manifestaron as supostas irregularidades.
Dende a ala crítica do colexio pensan distinto, e aseguran que Abel Vázquez si ten base legal para impugnar as eleccións e pedir unha repetición do proceso. Nun documento remitido ao Galicia Confidencial aseguran que as aparentes irregularidades se trasladaron tamén á validación do voto por correo. Finalmente, subliñan que Abel Vázquez continuará coa loita legal contra estas eleccións ante o Tribunal Superior de Xustiza de Galicia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.