Por Galicia Confidencial | SANTIAGO DE COMPOSTELA | 20/10/2021 | Actualizada ás 15:00
Galicia continúa co foco posto na xestión sanitaria do Sergas e a tan denunciada saturación da Atención Primaria. Na mañá deste mércores tivo lugar unha mesa sectorial entre o Sergas e os principais sindicatos do sector, que o pasado martes 19 se concentraron ante a sede do Servizo Galego de Saúde para protestar contra a vaga de recortes que vén de seguir á pandemia.
Lonxe de chegar a unha situación de consenso, ou de resposta ás presións sindicais, dende a CIG-Saúde denuncian que a reunión a varias bandas serviu para que o ente dependente da Consellería de Sanidade avanzara un novo plan precarizador da sanidade pública. E é que, de acordo coa Confederación, o Sergas estaría procurando cubrir dous postos de traballo cun só sanitario.
Esa sería a resposta da Consellería de Sanidade contra o colapso denunciado nas últimas semanas por diversas fontes e que se centraría na Atención Primaria. O cambio virá dado como parte da Lei de Acompañamento dos Orzamentos para 2022. No sector critican este recurso porque as normas da Lei de Acompañamento debátense cunha celeridade que impide a total chegada das cuestións interpeladas á esfera pública.
En concreto, e segundo detallan dende o sindicato, o artigo, que terá unha duración inicial de cinco anos, crea un novo posto de traballo orientado aos médicos de familia. Estes, ao ser contratados polo Sergas, estarán obrigados a traballar nas consultas dos centros de saúde e facer gardas nos PAC o que, até o de agora, era voluntario, di o sindicato.
“É dicir, unha soa médica vai cubrir dous postos de traballo”, denuncia a secretaria nacional de CIG-Saúde, María Xosé Abuín, que rexeita esta decisión e denuncia a falta de negociación porque “o único que fixeron onte foi tratar de validar este despropósito”. Abuín denuncia que lonxe de dar resposta á situación da Atención Primaria, que era en teoría o obxectivo para o que se convocara a mesa sectorial, “por presión sindical”, o que fixo o SERGAS foi “empeorar as condicións laborais creando un novo posto de traballo das médicas e médicos de Familia con dobre prestación de servizo: consulta ordinaria e PAC”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.