A menor agredida no Carballiño por un mozo sae da UCI tras 40 días e atópase "fóra de perigo"
A irmá da vítima expresou que agora "empeza a loita por conseguir que a miña irmá a pesar das súas lesións poida ter unha vida o máis plena posible".
Por Europa Press / Redacción | SANTIAGO DE COMPOSTELA | 20/10/2021 | Actualizada ás 17:46
A menor agredida no Carballiño por outro mozo a principios de setembro saíu da UCI do Complexo Hospitalario Universitario de Ourense tras 40 días en reanimación e atópase "fóra de perigo".
O suceso rexistrouse o pasado 9 de setembro. A nova, duns 14 anos de idade, atopábase en casa dun amigo un ano menor que ela, canto este agrediuna cunha pata de cabra na cabeza. Segundos despois, a menor caeu polo balcón da vivenda e sobreviviu ás feridas, aínda que quedou en estado crítico. Foi o propio agresor quen chamou ao 112 e trasladou que "acababa de matar á súa amiga" porque "quería saber o que sentía ao matar".
"Despois de 40 días en reanimación foi unha alegría inmensa para todos", celebrou a súa irmá maior e portavoz da familia, quen explicou que a menor se atopa en planta e "oficialmente está fóra de perigo".
Deste xeito expuxo que foron "40 días de loita, de agonía, de sufrimento, de impotencia, de medo, de frustración" e de moitos outros sentimentos, pero que "agora a loita é diferente". "Empeza a loita por conseguir que a miña irmá a pesar das súas lesións poida ter unha vida o máis plena posible".
A familia continúa esixindo un cambio na Lei do Menor incidindo en que "ninguén pode experimentar coa legalidade e a vida" dunha persoa e ser inimputable por ter menos de 14 anos. Así pois, o pasado 30 de setembro, día de aniversarios da menor, familiares e amigos concentráronse ante a Subdelegación do Goberno en Ourense coa petición da reforma da lei.
O próximo 30 de outubro realizarán unha marcha, diante da igrexa da Veracruz no Carballiño, coa mesma petición e "para seguir gritando que ninguén poida esconder o que pasou ou quitarlle importancia". Ademais nesta marcha terán unha mesa onde recoller firmas para 'Change.org' onde formalizan a petición e onde superan xa os 10.000 apoios.
