Por E.P. | SANTIAGO DE COMPOSTELA | 20/10/2021 | Actualizada ás 19:00
As contas da Consellería de Sanidade para o próximo ano 2022 contemplan a creación de 43 novas prazas de persoal de saúde mental, o que supón un aumento orzamentario de 1,7 millóns de euros respecto ao presente exercicio.
Así o destacou o conselleiro de Sanidade, Julio García Comesaña, durante a súa visita á nova unidade de psquiatría infanto-xuvenil que se puxo en marcha no hospital de Santiago e que se suma á xa creada no Hospital Nicolás Pena de Vigo.
O responsable autonómico sinalou que o proxecto de orzamentos para 2022 recolle un incremento nos fondos destinados á atención á saúde mental, segundo recolle un comunicado da Xunta.
Entre estas partidas inclúese a citada creación de 43 novas prazas, contempladas para 2022 no Plan de Saúde Mental de Galicia para o período 2020-24, así como un aumento de 1,5 millóns de euros nos concertos con entidades sociais para a atención de pacientes con problemas de saúde metnal.
O Goberno autonómico explica que esta partida permitirá a posta en marcha de iniciativas para persoas con trastornos mentais asociados a discapacidade intelectual, dano cerebral e persoas con trastorno mental severo.
O aumento de fondos aos concertos, remarca Sanidade, "suporá un importante incremento nas prazas concertadas en centros de rehabilitación psicosocial e laboral, pisos protexidos e unidades residenciais".
Ademais, tamén destacan que se incermenta as transferencias a entidades de saúde mental, adiccións e sociosanitarias, que dispoñen nas contas para 2022 de 8,8 millóns de euros consignados, 620.000 euros máis que o pasado exercicio.
Así mesmo, os investimentos en materia de saúde mental soben un 10% ata case os 975.000 euros, aos que se engaden o medio millón de euros que irán destinados á reforma do Hospital Psiquiátrico de Conxo, en Santiago.
HOSPITAL DE DÍA NO CHUS
Comesaña repasou estas cifras durante a súa visita ao Complexo Hospitalario Universitario de Santiago (CHUS) para coñecer o hospital de día infanto-xuvenil, o segundo que se pon en marcha ao amparo do Plan de Saúde Mental, que fixa como obxectivo contar cun en cada área santaria no ano 2023.
Alí, despois de que a entrada en funcionamento o pasado mes da primeira unidade destas características na cidade de Vigo, Sanidade prevé que boten a andar as de Lugo e Ourense antes de que conclúa 2021.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.