Por E.P. | SANTIAGO DE COMPOSTELA | 21/10/2021 | Actualizada ás 17:50
O Tribunal Superior de Xustiza de Galicia (TSXG) desestimou o recurso interposto por unha asociación (DOMO Acción Galicia) contra o protocolo aprobado pola Xunta para o curso 2020-2021 que obrigaba ao estudantado de centros non universitarios de Galicia a utilizar máscara debido á crise sanitaria.
A entidade solicitaba aos maxistrados que declarasen que se produciu "unha vulneración do dereito á vida, integridade física e moral" polos "danos e prexuízos" ocasionados aos menores, fillos dos socios, debido ao uso continuado da máscara nos centros escolares.
A asociación, no seu recurso contra a resolución de 4 de novembro de 2020, pola que a Consellería de Sanidade e a de Cultura, Educación e Universidade aprobaron a actualización do protocolo covid-19 para o curso 2020-2021, asegura que a medida do uso de máscara xerou "danos irreversibles e irreparables na saúde dos menores".
Na sentenza, os xuíces da sección terceira da Sala do contencioso-administrativo do TSXG subliñan que desde agosto de 2020, "vén reiterando que o uso da máscara é unha medida adoptada nun contexto de emerxencia sanitaria e de eficacia demostrada para a prevención da propagación do virus e para a protección das persoas sas".
"NON PODE PREVALECER INTERESE PARTICULAR"
Por iso, tal e como indicou nun auto anterior, considera que "non pode prevalecer o interese particular de quen sofre unha incomodidade no uso da máscara fronte ao interese público, cuxa salvagarda subxace na obrigación do seu uso".
Así, segundo informa o TSXG, considera que a "intervención estatal na liberdade individual" resulta "proporcionada aos fins buscados", que son "a protección da saúde dos cidadáns e unha protección terapéutica non especialmente invasiva". O TSXG conclúe na resolución, contra a que cabe presentar recurso, que debe prevalecer "o obxectivo constitucional de protección da saúde de todos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.