A Covid mantense nas portas dos 400 casos en Galicia
Soben os casos activosa 419, pero baixan os novos contaxios a 24.
Por Europa Press / Redacción | SANTIAGO DE COMPOSTELA | 25/10/2021 | Actualizada ás 11:00
Galicia arrinca esta semana, tras o primeiro fin de semana fóra de emerxencia sanitaria --estado que abandonou o venres pasado--, cun lixeiro aumento dos casos activos de Covid-19, que se sitúan en 419, e un descenso dos novos contaxios a 24 --dez menos--, mentres que os pacientes hospitalizados por este coronavirus mantéñense en 25. Pola súa banda, a taxa de positividade baixa a un 1,06 por cento en Galicia.
Segundo os datos publicados este luns pola Consellería de Sanidade con rexistros ata as 18,00 horas deste domingo, continúan sete persoas ingresadas en UCI e noutras unidades convencionais permanecen 18 hospitalizados, mentres que 394 pacientes atópanse en seguimento no seu domicilio.
Por áreas sanitarias, a presión hospitalaria alíviase na da Coruña e Cee, onde seguen tres pacientes Covid en UCI, pero baixan a catro os ingresados noutras unidades --un menos--; e soamente aumenta na de Ourense, que continúa sen críticos e rexistra tres ingresados en planta --un máis--.
Nas outras cinco áreas sanitarias non hai cambios con respecto á xornada pasada. Así, a de Vigo mantense sen pacientes Covid en UCI e con seis noutras unidades; a de Santiago e Barbanza segue sen críticos e con tres en planta; e a de Ferrol, con dúas en unidades convencionais.
Pola súa banda, na área de Lugo hai tres pacientes Covid en UCI e ningún noutras unidades; e na de Pontevedra e O Salnés hai un en críticos e segue sen ingresados en planta por este coronavirus.
AUMENTO DE CASOS
Esta semana comeza cun lixeiro aumento dos casos activos ata os 419, que supoñen catro máis que a xornada anterior, ao haber máis contaxios (24) que altas (20), polo que Galicia encadea dúas xornadas consecutivas de incremento.
En concreto, as infeccións activas aumentan en catro das sete áreas sanitarias: Vigo (+6), Lugo (+6), Pontevedra e O Salnés (+2) e Ourense (+1), mantéñense sen cambios en Ferrol e descenden nas de Santiago e Barbanza (-7) e A Coruña e Cee (-4).
Deste xeito, a área da Coruña e Cee segue como a única por encima do centenar de casos, con 130; seguida da de Vigo, con 70; Santiago e Barbanza, con 69; Pontevedra e O Salnés, con 51; Ourense, con 42; Lugo, con 33; e Ferrol mantense á cola, con 24.
BAIXAN OS CONTAXIOS
Tras superar a trintena a xornada do domingo, esta semana iníciase cun descenso dos novos contaxios ata os 24, que supoñen 10 menos que os 34 do domingo e un par por baixo dos 26 do sábado. O luns 11 de outubro rexistráronse 14, a cifra máis baixa desde que Galicia entrou en niveis de 'nova normalidade'.
Os 24 novos contaxios foron confirmados por Proba de Detección de Infección Activa nas últimas 24 horas, deles sete na área de Vigo; outros sete na de Lugo; catro na da Coruña e Cee; dous na de Ourense, outros dous na de Pontevedra e O Salnés; un na de Ferrol e outro na de Santiago e Barbanza.
En canto á taxa de positividade das probas PCR --número de infeccións detectadas cada 100 test-- comeza a semana cun 1,06 por cento tras concluír o fin de semana cun incremento ata o 1,61 por cento. Por iso, continúa por baixo do 5% que a OMS fixa como limiar para considerar controlada a pandemia.
