A Coruña, Málaga e Barcelona serán sedes de actividades conmemorativas do 50 aniversario da morte de Picasso
Na programación inclúese unha exposición internacional no primeiro semestre de 2023, na cidade herculina.
Por Europa Press / Redacción | A Coruña | 25/10/2021 | Actualizada ás 19:46
A Coruña, Barcelona e Málaga serán sedes da celebración dos eventos conmemorativos do 50 aniversario da morte de Picasso. Así o informa o goberno local tras a decisión adoptada esta tarde na constitución do pleno da comisión estatal para esta conmemoración, da que forma parte a alcaldesa herculina, Inés Rey.
O acto de constitución da comisión tivo lugar en Madrid e estivo presidido polo presidente do Goberno, Pedro Sánchez. Ao mesmo asistiron os ministros Miquel Iceta, José Alonso Bolaños e Manuel Albores, e a exministra Carmen Calvo, ademais das alcaldesas da Coruña e Barcelona, Inés Rey e Ada Colau, e do alcalde de Málaga, Francisco de la Torre, entre outros.
Rey mostrou a súa satisfacción pola elección da Coruña como sede de parte dos eventos que se celebrarán entre 2022 e 2023. "É unha moi boa nova xa que nos recoñece e sitúa no mapa das cidades picassianas, o que nos abrirá enormes oportunidades culturais, económicas e turísticas".
Na programación, inclúese a celebración na cidade dunha exposición internacional no primeiro semestre de 2023, 'Picasso, branco no recordo azul, A Coruña 2023', que relacionará as principais etapas da produción do artista con obras do seu período formativo na cidade.
