'A Santa Compaña' visitará Allariz na ponte de santos
O Concello de Allariz celebra a quinta edición do 'Allariz de Medo', coincidindo coa festividade de Samaín, recuperada da antiga tradición celta. A ambientación das rúas estará acompañada por varias animacións entre o 29 de outubro e o 1 de novembro.
Por X.M. Fernández | Allariz | 27/10/2021 | Actualizada ás 09:00
Ánimas, meigas e seres do máis alá protagonizarán un ano máis o 'Allariz de Medo' que terá lugar entre o 29 de outubro e o 1 de novembro polas rúas do casco histórico.
O Xardín das Cabazas estará localizado na Praza do Matadoiro, dende o xoves 28 ata o domingo 1, para que as crianzas coloquen a súa cabaza de Samaín. Segundo a lenda de Samáin as cabazas colocábanse iluminadas nos muros para que as ánimas que voltaban na noite de defuntos lembraran o camiño de volta. O Concello de Allariz repartirá de balde 100 cabazas, o sábado 23 de outubro, de 10:00h ás 14:00h no Mercado da Reserva da Biosfera, para que todas as crianzas que queiran recoller a súa cabaza e decorala, podan facelo.
O Concello de Allariz repartirá de balde 100 cabazas
O venres 29 haberá un Roteiro de Ánimas Infantís que partirá do alto da rúa do Portelo e rematará na Praza do Matadoiro. Os nenos e nenas, de entre 6 e 12 anos, que queiran participar deberán anotarse no correo participa@allariz.gal. A capacidade do roteiro será limitada.
O domingo 31 a Santa Compaña visitará as rúas de Allariz
O sábado 30 a ambientación das rúas de Allariz cobrará vida con animacións sorpresas en horario de 20:00h ás 22:00h, mentres que o domingo 31 a Santa Compaña visitará as rúas de Allariz de 19:00h ás 20:00h no previo a noite de defuntos.
O Concello de Allariz leva 5 edicións celebrando o Samaín, atraendo ano tras ano a veciños e veciñas, e tamén a visitantes, que se achegan as rúas para contemplar as escenografías que recrean parte da tradición do Samaín.
