Por E.P. | SANTIAGO DE COMPOSTELA | 26/10/2021 | Actualizada ás 18:22
A Policía Nacional e a Garda Civil renovaron as actividades nos centros educativos de Galicia e xa contan con máis de 300 solicitudes para participar este curso no Plan Director para a Mellora da Convivencia e a Seguridade dos Centros Educativos e as súas Contornas.
Así o anunciou este martes o delegado do Goberno en Galicia, José Miñones, durante a presentación dun vídeo contra o acoso escolar gravado en Pontevedra, no Centro Público Integrado O Toural de Vilaboa, e que se verá en toda España.
Acompañado pola subdelegada provincial, Maica Larriba; José Miñones incidiu na importancia da seguridade no ámbito educativo. "Imos manter o noso compromiso coa educación e a convivencia para construír e formar a mellor sociedade posible", dixo.
O delegado do Goberno detallou que este curso esperan superar os datos do 2019/2020. Entón foron 4.000 actividades en 1.100 centros educativos galegos, o 80% do total, nas que participaron 133.000 membros da comunidade educativa, principalmente alumnado, pero tamén profesorado e familias. Nesta comparecencia tamén se informou que a Garda Civil e a Policía Nacional realizaron 14.500 vixilancias nos centros escolares.
O bo uso das novas tecnoloxías é a temática máis habitual das actividades, seguida polo acoso escolar e a violencia de xénero. Outras temáticas habituais son o consumo de drogas ou alcol ou as bandas xuvenís.
José Miñones fixo un chamamento á "concienciación e sensibilización" da sociedade fronte a un problema prioritario, xa que o 44% dos estudantes de entre 7 e 14 anos foron vítimas de acoso.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.