Ferrol destinará máis de 30.000 euros ao Museo e ás actividades da Sociedade Galega de Historia Natural

O Concello de Ferrol destinará 32.500 euros á Sociedade Galega de Historia Natural (SGHN) poida manter o Museo que ten nesta cidade e para poder organizar diversas actividades ao longo do ano.

Así se recolle nun convenio asinado este mércores, 27 de outubro, polo alcalde de Ferrol, Ángel Mato (PSOE), e polo delegado en Ferrol desta entidade, Xan Rodríguez Silvar, nun acordo que foi formalizado nas instalacións do Museo de Historia Natural, emprazado desde hai anos na antiga Casa do coronel, no conxunto que forma o antigo acuartelamento do Sánchez Aguilera.

A esta firma tamén acudiu a edil de Medio Ambiente de Ferrol, Ana Lamas, xa que será esta a Concellaría encargada de achegar a dita axuda. O rexedor destacou "o traballo que a Sociedade Galega de Historia Natural desenvolve durante décadas para a divulgación dos valores ambientais" e lembrou que "se este museo está en Ferrol, foi por decisión dos propios asociados".

ÁMBITO AUTONÓMICO

Mato incidiu que neste espazo pódese contemplar a realidade natural "que fai de Galicia e de Ferrol lugares únicos". Pola súa banda, Rodríguez Silvar trasladou que este convenio económico "contribúe a ofrecerlle a toda Galicia, non só á cidade, unha colección absolutamente singular" e que por iso "o esforzo do Concello é moi de agradecer".

O acordo recolle a realización de actividades para escolares, visitas guiadas, cursos e talleres, a divulgación de información ambiental entre o público, a organización de exposicións temporais sobre natureza e medio ambiente, a edición de publicacións científicas e didácticas, a conservación dos fondos do Museo de Historia Natural e o mantemento dun punto de protección da fauna.

O alcalde de Ferrol, Ángel Mato, en rolda de prensa.