Trasladados dous homes debido a un incendio nunha vivenda en Viana do Bolo
Un deles sufriu unha crise de ansiedade e outro resultou ferido mentres colaboraba nos labores de extinción.
Por Europa Press / Redacción | OURENSE | 28/10/2021 | Actualizada ás 11:18
Dous homes foron trasladados para recibir asistencia sanitaria debido a un incendio rexistrado na noite deste pasado mércores nunha vivenda deshabitada da parroquia de Pexeiros, no municipio de Viana do Bolo, que calcinou o primeiro piso da casa, o tellado e numerosos obxectos. Así o informou o 112 Galicia, que indicou que pasadas as 21,00 horas deste mércores unha persoa avisou de que ardía unha casa no lugar de Bouza, no concello de Viana do Bolo.
Nesa mesma chamada, o particular indicou que había máis vivendas pegadas á afectada e que o lume podía estenderse cara a elas. Varios particulares alertaron do mesmo incendio nese punto. Por iso, por parte do 112 Galicia mobilizouse ao GES da Gudiña, á Garda Civil, e a Protección Civil de Viana, ademais dos servizos sanitarios.
Ao final das tarefas de extinción, os membros do Grupo de Emerxencias Supramunicipais da Gudiña confirmaron ao 112 Galicia que o incendio non pasara ás casas lindeiras e que, na vivenda afectada, ardera un piso e o tellado.
Ademais, comunicaron que unha persoa fora trasladada ao centro de saúde da zona por mor dunha crise de ansiedade e outra por resultar ferida mentres colaboraba nos labores de extinción.
En concreto, o 061 desprazou unha ambulancia e persoal de Atención Primaria para atender a dous homes, C.R.G., de 61 anos de idade, e A.R.V., de 25 anos, ambos os levados ao centro de saúde da zona, confirmaron a Europa Press fontes sanitarias.
