Por Europa Press / Redacción | SANTIAGO DE COMPOSTELA | 28/10/2021 | Actualizada ás 11:48
O proceso de vacinación contra a Covid-19 no conxunto de Galicia continúa coa administración doutras 11.100 doses e con 582 persoas máis que finalizaron o proceso.
Deste xeito, aumenta ao 84,89 por cento a cidadanía con pauta completa de entre o total de habitantes da Comunidade galega e a un 93,38% a poboación diana --maiores de 12 anos-- inmunizada.
Segundo os datos publicados na mañá deste xoves pola Consellería de Sanidade no 'Cronómetro de vacinación' con respecto á xornada do mércores, recollidos por Europa Press, administráronse ata a data 4.452.703 doses, que representan 11.111 máis que o día pasado, o 98,72 por cento das 4.510.249 recibidas en Galicia ata o momento.
Das doses administradas 582 foron para completar pauta, o que eleva a 2.292.108 os habitantes co proceso finalizado no conxunto da Comunidade galega, o 84,89 por cento da poboación total.
Por grupos de poboación por vulnerabilidade, hai 19.213 cidadáns de alto risco coa pauta completa; 17.589 dependentes non institucionalizados e 27.276 institucionalizados. Mentres, 2.083.622 vacináronse chamados pola súa idade.
Por probabilidade de exposición, 72.655 profesionais do ámbito sanitario teñen pauta completa, 27.168 do sociosanitario e 44.076 traballadores de actividades consideradas esenciais tamén a recibiron.
O proceso de vacinación contra este coronavirus prosegue nos hospitais do Servizo Galego de Saúde, despois de pechar os centros de vacinación masiva, coa administración de segundas doses pendentes e autocita para maiores de 12 anos, así como coa posibilidade de acudir sen cita previa. E desde este pasado luns, os maiores de 80 anos reciben a dose de reforzo contra a Covid en centros sanitarios de cabeceira, en paralelo coa campaña antigripal.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.