A Deputación de Pontevedra mellorará o servizo de teleasistencia domiciliaria

A xunta de goberno da Deputación de Pontevedra aprobou este venres unha adenda ao convenio subscrito con 46 concellos para prestar o servizo de teleasistencia domiciliaria, dirixido ás persoas maiores ou discapacitadas que vivan soas ou ás persoas que estean acompañadas e teñan as súas facultades moi mermadas para valerse na vida cotiá.

Este servizo, vixente desde o ano 1998, leva a cabo por medio dun convenio de colaboración entre a Deputación de Pontevedra e os concellos da provincia de menos de 20.000 habitantes. "É un servizo moi necesario, sobre todo nas zonas do rural", sinalou a presidenta provincial, Carmela Silva.

Como principais novidades desta adenda, a partir de agora tamén poderán beneficiarse da teleasistencia aquelas persoas que se trasladen á vivenda doutra persoa por deterioración física (antes unicamente era para aquelas que vivían soas). Ademais amplíanse os tramos de renda.

MÚSICA E DEPORTE

A presidenta da Deputación de Pontevedra tamén anunciou que a xunta de goberno provincial aprobou este venres as axudas ás escolas de música.

Son 80.000 euros para gastos de funcionamento de 24 entidades --Agolada, Barro, Cangas, Lalín, Mos, As Neves, Ponteareas, Pontevedra, Redondela, Ribadumia, O Rosal, Salceda, Silleda, Vigo, Vilaboa e Vilanova--.

Ademais, nesta mesma sesión, aprobáronse as axudas #DepoOlimpic, 18 bolsas de 5.000 euros cada unha ata completar un total de 90.000 euros para 6 mulleres e 12 homes deportistas que participaron nos Xogos Olímpicos de Tokio.

A Deputación de Pontevedra concede estas axudas con independencia de que estes deportistas obtivesen ou non un diploma olímpico. "Porque chegar aos Xogos xa é unha heroicidade", destacou Carmela Silva.

E para apoiar o deporte feminino "lanzamos as novas axudas á formación de técnicas e adestradoras para alcanzar os títulos esixidos". Carmela Silva sinalou que no deporte feminino de elite os homes son o 84%.