Marcha no Carballiño para unha reforma da lei do menor e en apoio á moza á que tentou matar un amigo de 13 anos

A familia da menor agredida no Carballiño por un amigo que afirmou que quería saber "o que sentía" ao matar organizou unha nova concentración, nesta ocasión no concello onde tiveron lugar os feitos, na que participaron varias decenas de persoas.

Familia, amigos e veciños concentráronse diante da Igrexa da Veracruz da localidade, onde organizaron unha marcha ata a Praza Maior pedindo unha reforma da Lei do Menor, para que os menores de 14 anos non sexan inimputables.

A adolescente tiña 14 anos cando foi atacada cunha pata de cabra por un amigo de 13 anos, que tiña a intención de matala para "saber que sentía", segundo el mesmo declarou ás autoridades.

A vítima estivo na planta de reanimación "para ter máis preto o quirófano", segundo explicou a familia, ata hai un par de días, cando foi subida a planta, onde "evoluciona día a día segundo", explica a súa irmá que traslada que aínda non se coñece o alcance das secuelas.

Pola súa banda, o menor leva unhas semanas internado nun centro para adolescentes con problemas de conduta tutelado pola Xunta de Galicia, xa que ao ter menos de 14 anos non se enfronta a responsabilidades penais.

Contra esa situación maniféstase a familia da vítima que, aproveitando a convocatoria de hoxe, instalou unha mesa de recollida de firmas, de forma presencial, para sumalas ás que recolle a través da plataforma de Change.org solicitando o cambio da Lei do Menor, onde se achegan aos 11.000 apoios.

No transcurso da concentración, Cristina Martín, irmá da moza agredida reivindicou que a súa irmá "sobreviviu". "A pesar da gravidade das lesións, o estado crítico e a dor segue connosco hoxe", proclamou, interrompida por aplausos e berros de "guerreira!".

"Pero a nosa vítima non acaba aquí. A miña irmá foi vítima dun intento de asasinato", advertiu, e lamentou a actual regulación da lei do menor, antes de reivindicar que é preciso impulsar unha reforma, dado que a súa "inflexibilidade" actual deixa á sociedade, proclamou, "desprotexida".

"Se a miña irmá non sobrevivise non cambiaría nada. Por cada familiar e amigo que queiramos protexer temos que seguir berrando pola modificación da lei do menor, porque mentres iso non ocorra, a xustiza seguirá sendo cega e non atopará a paz", concluíu.