Por Europa Press / Redacción | A CORUÑA | 02/11/2021 | Actualizada ás 18:07
A Fundación Española para a Ciencia e a Tecnoloxía (FECYT) adxudica, na última convocatoria de axudas para o fomento da cultura científica, tecnolóxica e da innovación, 335.700 euros para desenvolver 19 proxectos de divulgación e comunicación da ciencia e a innovación en Galicia. Segundo informa a Delegación do Goberno, Galicia é a cuarta comunidade autónoma en número de solicitudes concedidas, cunha taxa de éxito do 32,76%, e a quinta en importe concedido.
Os proxectos obxecto das axudas agrúpanse ao redor de cinco liñas de actuación: cultura científica, tecnolóxica e da innovación; educación e vocacións científicas; ciencia cidadá; redes de comunicación e divulgación da ciencia e a innovación e pensamento crítico.
Entre os proxectos que se financiaron nesta convocatoria en Galicia destaca 'Maker Faire Galicia', que en 2022 celebrará a súa oitava edición. O obxectivo do evento é "xerar un espazo de encontro entre makers de distintos ámbitos da ciencia, a tecnoloxía e a cultura".
BANDA ANCHA
Por outra banda, o delegado do Goberno, José Miñones, avanzou proxectos por 30.183.840 euros para estender a cobertura de banda ancha ultrarrápida en 278 concellos de Galicia. Explicouno tras a proposta de resolución provincial da convocatoria do ano 2021 do Programa de Universalización de Infraestruturas Dixitais para a Cohesión ÚNICO-Banda Ancha.
José Miñones enmarcou esta iniciativa no "compromiso do Goberno coa conectividade e a dixitalización, ademais do reto demográfico", todo enmarcado no Plan de Recuperación, Transformación e Resiliencia do Goberno.
O Ministerio de Asuntos Económicos e Transformación Dixital impulsa este programa polo que se beneficiarán 89.548 fogares e empresas en Galicia ata agora sen cobertura dunha velocidade de acceso superior a 100 Mbps.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.