Por Europa Press / Redacción | SANTIAGO DE COMPOSTELA | 03/11/2021 | Actualizada ás 13:57
A sección primeira da Audiencia Provincial da Coruña notificou este mércores o contido completo do auto no que decretou a posta en liberdade do último detido polo crime de Samuel Luiz, A.M.R., ao entender que non existe risco de fuga nin de alteración de probas, segundo informa o Tribunal Superior de Xustiza de Galicia (TSXG).
O tribunal destaca tamén que a policía lle atribúe "unha posición de apoio a quen materializaron a brutal agresión", pero non determina "acto algún de ataque sobre a vítima". Por iso, impúxolle outras medidas "menos aflictivas" que a de prisión provisional, como son a obrigación de comparecer cada semana e cantas veces fose chamado ante o xulgado que tramita a causa, así como a prohibición de abandonar o territorio nacional.
A Sala explica no auto que a súa función se limita a decidir sobre a situación persoal do investigado, xa que "o contido e a suficiencia dos indicios racionais de criminalidade existentes" respecto del deberán ser valorados nun posterior momento procesual. "Do que se trata non é tanto de analizar a gravidade do feitos obxecto de instrución, o futuro título de imputación ou o comportamento procesual previo do apelante, como da necesidade e a proporcionalidade da adopción da medida de prisión provisional", subliñan os maxistrados.
Desta forma, indican que, aínda que non teñen coñecemento "directo e inmediato" do desenvolvemento das dilixencias, "non se albiscan novas vías de investigación, nin unha futura extensión do obxecto da acusación, nin unha posible ampliación do círculo de investigados". Por todo iso, entenden que son "nulas" as posibilidades do apelante de frustrar "o normal impulso e concreción da causa" mediante a alteración das fontes de proba. Os xuíces tampouco detectan risco de fuga.
Respecto diso, aseguran que "parece improbable que, tras varios meses sen ser involucrado nos feitos como partícipe, agora opte por subtraerse á acción da xustiza, tras gozar de plena liberdade para facelo e ante unha imputación aínda difusa". Contra o auto non cabe presentar recurso.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.