Galicia recibiu nove peticións de eutanasia dende a entrada en vigor da lei

Galicia recibiu un total de nove peticións de eutanasia desde a entrada en vigor da lei que a regula, o 25 de xuño de 2021. Aínda que oficialmente se puxo en marcha, o decreto autonómico non se materializou ata xullo, cando se creou a Comisión de Garantía e Avaliación da Eutanasia galega, que preside a anestesista da área sanitaria da Coruña Neves Molins Gauna.

En declaracións aos medios este mércores en Oleiros, o titular da Consellería de Sanidade, Julio García Comesaña, subliñou que a Xunta está "a cumprir estritamente os prazos" e rexeitou calquera acusación de "lentitude". As peticións, dixo, analízanse "de forma ordinaria" e o ritmo "vén derivado das peticións". Comesaña, que ratificou as noves peticións, indicou que cada unha ten un grao de avaliación e co resultado que outorga a comisión, o cal non detallou."Só informamos as peticións que nos cheguen, que evolucionan segundo a norma e as características de cada paciente", apuntou o conselleiro.

Arquivo - Un home cun cartel no que se le: `Poder elixir o morrer sen sufrir´ durante unha concentración de Dereito a Morrer Dignamente na Porta do Sol, en Madrid (España), a 18 de marzo de 2021.. Marta Fernández Xara - Europa Press - Arquivo | Fonte: Europa Press

A comisión de garantías ten carácter multidisciplinar e está composta por doce persoas, entre as que hai tres xuristas con coñecementos en dereito sanitario ou bioética (como integrante está o maxistrado Miguel Ángel Cadenas, que foi presidente do Tribunal Superior de Xustiza de Galicia --TSXG--).

PETICIÓN

Precisamente, este mesmo mércores, o colectivo Dereito a Morrer Dignamente presentou por rexistro unha carta dirixida ao conselleiro de Sanidade para solicitar que no documento de instrucións previas --tamén coñecido como testamento vital-- se inclúa especificamente a posibilidade de optar pola eutanasia, se se cumpren os requisitos establecidos, unha vez que se perdan as facultades de decidir.

O testamento vital, incluído na lei de autonomía do paciente, é un documento mediante o cal unha persoa maior, capaz e libre, manifesta anticipadamente a súa vontade sobre os coidados e tratamentos que podería precisar no futuro e o destino final do seu corpo, co fin de que a súa vontade sexa respectada no momento en que, por determinadas circunstancias, non poida expresala persoalmente.

Neste sentido, o presidente do colectivo, Miguel Anxo García, explicou a Europa Press que este mesmo mércores rexistrouse esta petición para que se inclúa "expresamente" esta posibilidade, algo que atribúe a unha "forma de seguir resistíndose" ao cumprimento da normativa, do mesmo xeito que, dixo, o feito de non publicitar o decreto polo que se aprobou a creación da comisión.