Por E.P. | Santiago de Compostela | 05/11/2021 | Actualizada ás 15:55
O BNG levará ao próximo pleno da Cámara galega unha proposta para instar á Xunta a que empezo a "traballar en serio" na recuperación ambiental dos terreos de Ence en Lourizán, unha vez que peche a fábrica de pasta de papel.
O deputado autonómico Luís Bará debullou esta iniciativa, que tamén inclúe a procura de alternativas á fábrica de Pontevedra.
Así, os nacionalistas pedirán á Xunta que "se anticipe ao que vai vir" e "asuma a realidade da sentenza" que anula a prórroga outorgada á fábrica de celulosas para continuar na ría de Pontevedra ata o ano 2073 e, por tanto, que busque un emprazamento para un novo complexo industrial ao redor da transformación da madeira en celulosa, en papel e outros produtos derivados demandados polo mercado e de alto valor engadido.
O Bloque entende que debe ser a Xunta quen asuma a responsabilidade de procurar os terreos.
Desde o BNG tamén propoñen crear un consorcio público-privado, impulsado pola Xunta e o sector, para que se poña á fronte dun proxecto tractor cunha nova fábrica de celulosa e unha papeleira que complete o ciclo produtivo do papel.
Luís Bará considerou que, no Goberno galego "non poden ser teleñecos de Ence", senón que deben estar "ao servizo de Galicia" e "cumprir coas súas funcións e competencias" no medio ambiente, territorio e industria.
Ademais, os nacionalistas instarán á Xunta a que se adiante ao escenario post-Ence e empece a traballar na recuperación dos terreos que ocupa a industria pasteira planificando xa o proceso de desmantelamento, descontaminación e recuperación produtiva do seu asentamento na ría. O custo desta recuperación terá que ser asumido pola propia empresa.
Para financiar este "ambicioso" consorcio, o BNG aposta por empregar fondos públicos, tanto os Next Generation da Unión Europea como recursos estatais e autonómicos e defende que, no seu conxunto, crearía máis postos de traballo e máis riqueza en Galicia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.