Por E.P. | SANTIAGO DE COMPOSTELA | 06/11/2021 | Actualizada ás 15:32
A catedrática de medicina legal e forense e directora do Instituto de Ciencias Forenses (Incifor) da USC, Vitoria Lareu Huidobro, será distinguida co premio María Josefa Wonenburguer deste ano. Diso informou este sábado a Xunta de Galicia nun comunicado, no que explica que a decisión foi comunicada no último pleno da Unidade de Muller e Ciencia do Goberno galego.
Con este premio, o Executivo autonómico recoñece a traxectoria de mulleres galegas que destacan pola súa contribución á área das ciencias e a tecnoloxía.
Esta médica formouse na Universidade de Santiago de Compostela e en centros estranxeiros de prestixio en materia de medicina forense como o Instituto de Medicina Legal de Coimbra en Portugal, ou nos centros Haematology Departmen London, Hospital Medical College de Londres e no Forensic Science Service de Birmingham.
Na actualidade, Lareu compaxina o traballo de laboratorio dentro do Instituto de Ciencias Forenses Luís Concheiro coa actividade docente na Facultade de Medicina de Santiago.
Este servizo recibiu encargos, entre outros moitos, para axudar á identificación das vítimas dos atentados do 11-S e do 11-M, análise de restos históricos de Atapuerca ou da Guerra Civil, do tsunami do Océano Índico, ou das nenas asasinadas en Alcasser.
Lareu é especialista no campo da xenética forense, onde participou no deseño de ferramentas básicas en pericia de xenética forense hoxe de uso mundial. Na actualidade a súa actividade diríxese principalmente a campos pioneiros da investigación forense como a aplicación de tecnoloxías de secuenciación masiva de nova xeración ou o estudo de aplicación da marca epigenética do xenoma humano. A galardoada colabora, ademais, na análise de mostras biolóxicas en casos de criminalística, o que lle permitiu percibir a cruz con distintivo branco da Orde de Mérito da Garda Civil.
O premio María Josefa Wonenburger foi creado pola Xunta para distinguir a aquelas mulleres galegas con traxectorias notables nos ámbitos das ciencias e da tecnoloxía. Tratar e facer chegar á sociedade as contribucións feitas por elas e que sirvan de exemplo a futuras xeracións.
A Xunta destaca que considera prioritario incrementar a presenza da muller nos ámbitos científicos e tecnolóxico de Galicia, pois unha maior presenza de mulleres na investigación contribuirá a enriquecer a actividade científica coa achega de novos temas e perspectivas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.