Por Europa Press / Redacción | Compostela | 08/11/2021 | Actualizada ás 13:12
O Concello de Santiago leva emitidos 5.783 bonos 'Corazón Compostela', destinados ao comercio e á hostalaría, polo que o alcalde, Xosé Sánchez Bugallo, fixo un chamamento para que a cidadanía solicite os máis de 14.000 restantes que quedan por retirar ata o 10 de decembro, cando terminará o prazo.
Na súa rolda de prensa habitual dos luns, tras a xunta de goberno local, o rexedor explicou que desde o venres houbo "unha subida importante" na expedición destes bonos que se poden empregar en 326 locais adheridos. "Pero aínda queda moito camiño por percorrer", engadiu.
O Concello puxo a disposición dos composteláns e veciños da contorna un total de 20.000 bonos --de 30, 50 ou 75 euros, o 40 por cento financiado polo goberno local--, para os que as arcas municipais consignou uns 600.000 euros.
Cada tenda ou establecemento adherido a esta campaña poderá recibir ata 10.000 euros a través dos bonos 'Corazón Compostela', unha contía que se ampliou debido a que algún dos locais xa superara o tope establecido anteriormente.
Con todo, o alcalde non descartou volver ampliar este límite en vistas de que algún negocio o volveu a superar. "En principio, o obxectivo de pór o tope é que un maior número de establecementos se puidese beneficiar", xustificou Bugallo, quen ademais explicou que, se hai 326 adheridos e algún esgotou xa o máximo, iso significa que "hai moitos que aínda non se estrearon".
Neste sentido, o rexedor considera que os negocios que "non son capaces" de beneficiarse desta campaña é "porque non se implican". Por iso, ademais de chamar aos veciños a solicitar os bonos, apelou a que os propios locais oferten esta posibilidade aos compradores.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.