Pontón reivindica o nacionalismo dun BNG que se afasta do independentismo: "Avanzamos cando nos fixemos entender"

A Executiva Nacional do BNG mantivo este luns, apenas unhas horas despois da clausura da XVII asemblea nacional, a súa primeira reunión deste "novo ciclo" político, en palabras da súa portavoz nacional, Ana Pontón, quen volveu a lanzar a mensaxe do momento "histórico" no que se atopa a formación para "disputarlle a hexemonía" ao PPdeG nas eleccións de 2024. Iso, defendeu, sen renunciar aos seus "principios". nacionalistas "O BNG sempre foi moi claro", remarcou,

Pontón subliñou que no propio nome xa se definen como "nacionalistas", unha forza "que só se debe a Galicia". "Estamos no mesmo lugar no que estabamos", incidiu, antes de proclamar que o BNG "non se moveu".

Con todo, ela mesma recoñeceu na asemblea que a formación tivo que facer "axustes" na estratexia. Preguntada epor estas palabras pronunciadas, contestou: "O BNG demostrou ao longo destes cinco anos que, sen renunciar aos principios do nacionalismo, fomos capaces de avanzar cando nos fixemos entender".

Así, sinalou que esta reflexión foi a que se fixo "no seu momento", porque "o importante é que os galegos saiban o que defende" o BNG. "Somos máis BNG ca nunca", resolveu a líder nacionalista.

Neste sentido, destacou que "o importante" é que os galegos saiban que o BNG "defende os recursos do país, os servizos públicos, a chave do diñeiro para Galicia". "Conseguimos en cinco anos pór ao nacionalismo como o proxecto alternativo", subliñou, e lembrou que se afiliaron máis de 1.400 persoas ao partido.

"Imos ir a por esa maioría social, ensanchando por ese camiño e ímolo a facer con toda xenerosidade, porque a alternativa está no BNG", subliñou Pontón, quen contrapuxo o proxecto do Bloque co do PP, ao que advirte "nervioso", dixo na asemblea.

O DEBATE NA ASEMBLEA

A XVII asemblea serviu tamén para deixar liquidada esta discusión interna ante as voces, que non lograron ningún cambio na estratexia política marcada pola dirección. Algunhas das emendas presentadas querían incluír nos textos, incluída na parte de premisas para un eventual goberno da Xunta, a "construción da República Galega" ou, dito con outras palabras, citando a dun militante, o "descolgue" de España.

Pero ningunha das intencións trasladadas nas emendas que chegaron ao plenario conseguiron un apoio maioritario da militancia e foron rexeitadas nas votacións que se sucederon na xornada de mañá e de tarde. Pola mañá, foi o membro da executiva e da comisión redactora Rubén Cela o encargo de contestar que o BNG "non é independentista", senón a "casa común do nacionalismo" no que caben outras concepcións confederais ou federais.

A idea lanzada internamente é conseguir máis "soberanismo", un termo que nas súas diferentes variantes aparece "unhas 23 veces" nos textos, segundo replicou "de memoria" na asemblea o deputado e dirixente nacionalista Manuel Lourenzo. Ese é o obxectivo do BNG, porque, en palabras de Cela o mundo está cheo de "países independentes" que, con todo, "non son soberanos".

"A FORZA QUE SÓ SE DEBE A GALICIA"

Este luns e ligado con iso, Pontón remarcou que o "BNG foi moi claro sobre os seus principios". "Somos unha forza que só se debe a Galicia. Estamos no mesmo lugar no que estabamos, somos unha nación", defendeu, á vez que remarcou que cada vez máis galegos comparten os seus razoamentos e, de aí, que todo o seu "traballo" se centre en chegar a quen levan a Galicia "na cabeza e o corazón". É, engadiu, "o gran reto colectivo, chegar ás maiorías sociais" para "presidir a Xunta de Galicia en 2024".

A líder nacionalista arrincou cun "grazas á militancia" polo "valor e entusiasmo" da asemblea, así como polo apoio recibido --a súa candidatura conseguiu o 99,5 por cento dos votos emitido (1.203 sufraxios)--. "Temos que dar o mellor de nós, cun reto por diante, cada unha das persoas que temos na executiva nacional temos que actuar con humildade e ir a por todas para facer historia. Sempre con humildade e máximo orgullo, para liderar un BNG capaz de pór en marcha un proxecto gañador para disputar o goberno ao PP", subliñou.

O "obxectivo", engadiu, é "darlle a Galicia un goberno ao servizo do país, capaz de construír un futuro de esperanza, un goberno transformador" e que atenda os problemas dos galegos, dos traballadores e das pequenas e medianas empresas. "Pór en marcha unha Galicia en grande, como pensa o BNG, máis igual e máis xusta, máis ecoloxista", apuntou.

Baixo esa premisa de que o BNG "non se moveu", defendeu que a idea de "soberanismo" significa "capacidade de decisión". "Aí é onde estabamos e onde seguimos": defensa do sector enerxético, AP-9, sector industrial.

O PRIMEIRO PASO, AS MUNICIPAIS

Tal e como marcan os documentos estratéxicos, o BNG ten a mirada posta nas eleccións autonómicas de 2024, pero cunha primeira proba nas municipais. Neste sentido, proponse reforzar o BNG naqueles concellos que xa lideran e conseguir máis gobernos para facer chegar o proxecto nacionalista.

Son "fundamentais" para "fortalecer un gran proxecto nacional" para Galicia, para "disputar esa hexemonía ao PP" e coa "aspiración de presidir a Xunta". "Coa convicción de que imos conseguilo", proclamou Pontón, que destacou que desta asemblea o BNG sae "máis reforzado, máis unido, máis cohesionado e vai traballar sen descanso para en 2024 lograr unha Presidencia nacionalista".

"Este ciclo ábreno os galegos, que moveron o taboleiro poñéndonos de segunda forza política nas eleccións", apuntou. Por iso, agora é preciso, sostivo, "seguir gañando máis xente" e situarse como a alternativa, porque "o cambio ou é galego ou non será".

CO PSOE

Preguntada pola situación do PSOE, que vén de celebrar primarias e de elixir a Valentín González Formoso como secretario xeral do PSdeG, cargo que ten que ser ratificado agora polo congreso galego en decembro, Pontón subliñou que son "dúas forzas distintas" pero tendeu as pontes que manteñen cos socialistas.

"Sempre que o PP non ten maioría absoluta", lembrou, a "vocación" é "chegar a acordos", como así ocorre en concellos e deputacións. "Sobre esa senda imos seguir traballando, coa mesma cordialidade de sempre", sentenciou.