A Deputación da Coruña promove unha campaña para fomentar o galego na ciencia
Por Europa Press / Redacción | Santiago de Compostela | 10/11/2021 | Actualizada ás 19:55
A Deputación da Coruña, a través da área de Normalización Lingüística, pon en marcha este mércores, Día da Ciencia en Galego, a campaña 'As Palabras da Ciencia'.
Segundo informa, a iniciativa, que se estenderá ata final de mes, quere mostrar "o firme compromiso da institución provincial co mundo científico e a importancia de dinamizar o galego nun sector de indubidable referencia social".
Sobre o proxecto, resalta tamén que "quere servir de pequeno escaparate do labor de tantas mulleres e homes que traballan en múltiples disciplinas científicas e quere facelo coas nosas palabras, porque en galego tamén se constrúe ciencia".
A campaña, que contará cunha imaxe gráfica propia, difundirá nas redes sociais da institución provincial contidos que asocian os valores da ciencia co uso do idioma.
