O fillo de Xela Arias inaugura este xoves un simposio da RAG sobre a figura da homenaxeada nas Letras Galegas
Será unha tarde centrada en "a vida e o compromiso social e cultural da homenaxeada".
Por Europa Press / Redacción | A CORUÑA | 11/11/2021 | Actualizada ás 10:31
Darío Gil, fillo de Xela Arias, abrirá este xoves, día 11, o simposio que a Real Academia Galega lle dedica no mes de novembro á protagonista do Día das Letras Galegas 2021.
Será, segundo informa a institución académica, unha tarde centrada en "a vida e o compromiso social e cultural da homenaxeada" e que contará con achegas da profesora da Universidade de Vigo Ana Iglesias e a escritora Marga do Val, amigas persoais da autora.
A xornada terminará cunhas palabras do académico Darío Xohán Cabana dedicadas a Xela Arias e un recital poético ao que se sumarán Emma Pedreira e Dores Tembrás, xunto a Darío Gil Arias, Yolanda Castaño e Marga do Val.
O simposio 'Xela Arias' continuará os días 18 e 25 de novembro na sede a institución académica, a partir das 18,00 horas. A entrada é libre e as sesións poderán seguirse tamén a través de academia.gal e da canle de Youtube da RAG.
O tres xornadas, explica a institución académica, concibíronse como "un punto de encontro para profundar na análise da escritura, a tradución e o labor de edición da autora e tamén para gozar da súa creación a través da palabra recitada, a música, cunha actuación a cargo da Banda da Loba, e o audiovisual, coa presentación da serie web documental Xela Arias".
