TelecardioCHUS' e 'ReCO', entre os proxectos galardoados na II edición dos 'Premios á Innovación en Saúde'
O certame quere pór en valor as ideas innovadoras nas que traballan os profesionais sanitarios, os seus pacientes e as asociacións sen ánimo de lucro, na procura de mellorar a calidade de vida da poboación e na sustentabilidade do sistema.
Por E.P. | SANTIAGO DE COMPOSTELA | 12/11/2021 | Actualizada ás 17:20
Os proxectos 'TelecardioCHUS' e 'ReCO' foron recoñecidos no II 'Premios á Innovación en Saúde', entregados este venres no Hospital Universitario Lucus Augusti de Lugo.
Os galardóns, promovidos pola Axencia Galega do Coñecemento en Saúde (ACIS), contan con dúas categorías -profesional e pacientes-, co fin pór en valor as ideas innovadoras nas que traballan os profesionais sanitarios, os seus pacientes e as asociacións sen ánimo de lucro, na procura de mellorar a calidade de vida da poboación e na sustentabilidade do sistema.
Na primeira categoría resultou escollido 'TelecardioCHUS', presentado polo equipo formado por José Ramón González Juanatey, Alejandro Virgós, Pilar Mazón e Rosa Represas, permitirá adaptar o modelo asistencial baixo a premisa de resolver no nivel asistencial acomodado aos actos médicos, para evitar aqueles que non acheguen valor nin aos pacientes nin ao sistema.
Pola súa banda, o programa 'ReCO', presentado por Bibiana Villamayor Branco, Carlos Pena Gil, Milagres Pedreira Pérez e José Ramón González Juanatey, incide no uso dos espazos dispoñibles para a Rehabilitación Cardíaca co impulso de desenvolver programas de rehabilitación en pacientes con cancro.
Na categoría de asociacións e pacientes, o proxecto galardoado nesta segunda edición foi 'Telemedicina en tempos de COVID, durante e post COVID', presentado pola Asociación Galega de Fibrose Quística.
Esta candidatura busca instalar un sistema de telemedicina con monitorización telemática, recollida de mostras e envío de medicación ás persoas con Fibrosis Quística; coa intención de posibilitar a mellora do benestar físico e emocional destes pacientes, á vez que se garante a calidade asistencial sanitaria e o seu seguimento.
Este proxecto contempla o seguimento habitual das persoas que padezan esta doenza en situacións de urxencia, e o emprego de diversos dispositivos para a súa monitorización telemática. Así mesmo, propón a creación dunha rede conxunta de información a través de 'TELEA'.
INNOVACIÓN SANITARIA
O conselleiro de Sanidade, Julio García Comesaña, presidiu o acto de entrega de premios a este certame no que participaron un total de 99 proxectos, dos que 75 corresponderon á categoría profesional e 24 á modalidade de asociacións e pacientes.
Comesaña valorou a importancia da innovación en materia sanitaria e o traballo desenvolvido polos participantes, ademais de destacar o incremento das candidaturas respecto da pasada edición (unhas 30 máis De entre todas elas, 11 proxectos chegaron ata a final do certame.
