Por Europa Press / Redacción | SANTIAGO DE COMPOSTELA | 15/11/2021 | Actualizada ás 13:46
O presidente da Federación Galega de Hostelería, Cheché Real, manifestou a preocupación que existe no sector ante a posibilidade de que regresen as restricións polo repunte de casos covid que se dá en Galicia durante os últimos días.
Este luns, o tamén presidente dos hostaleiros lugueses afirmou que practicamente estaba pechado coa Xunta permitir a "apertura ao cento por cento das licenzas" na primeira semana de decembro, aínda que agora teñen "dúbidas" sobre iso.
"Noticias como estas, dun repunte de casos, é unha volta atrás que se produce polos malos comportamentos, por moi malos comportamentos e pola insolidariedade dalgúns e que vai repercutir en todo o tecido empresarial da hostalaría e do turismo de Galicia", advertiu.
O empresario lucense sostén que "isto é imperdoable" dado que, ao seu xuízo, "non se pode tratar unha pandemia deste calado na forma en que se está tratando e hai que seguir mantendo as distancias de seguridade e o uso da máscara".
"O virus non se marchou. E aquí polo mal comportamento e pola falta de sentido común dalgúns ímolo pasar mal", aseverou Real, que advirte da "repercusión económica, tanto nas empresas como nos traballadores" se se produce "unha marcha atrás".
"Xa se dá por perdido o dos últimos dous anos e cando iamos retomando outra vez ese dinamismo, ese costume de volver saír, vémonos nesta. O virus non se foi, nin se vai a ir", abundou, á vez que insiste na necesidade de manter as distancias de "seguridade" e no uso da máscara.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.