Feijóo, disposto a apoiar a intervención do Goberno central en Alcoa

O presidente da Xunta de Galicia, Alberto Nuñez Feijóo, e a ministra de Industria, Turismo e Comercio, Reyes Maroto, mantiveron este luns unha reunión na que, entre outros temas, abordaron a problemática da fábrica de Alcoa en San Cibrao, sinalando directamente a ministra á propia empresa como o principal atranco, mentres que o mandatario galego sinalou que apoiaría unha posible intervención da SEPI.

Así se expresaron ambos os dirixentes en declaracións aos medios de comunicación ao termo desta reunión na sede ministerial que durou unhas dúas horas, e na que Feijóo trasladou a Reyes Maroto varios proxectos para concorrer aos fondos europeos, á vez que abordaron distintos problemas como o de Alcoa, Ence ou Alu Ibérica, entre outros.

"Voume cunha liña de contacto máis fluída coa propia ministra e o seu equipo, e oxalá podamos dar pronto algunha boa nova, os traballadores de Alcoa necesitan unha certidumbre, que se pasa pola SEPI, o Goberno galego vaina apoiar", proclamou Feijóo nunha declaración conxunta con Reyes Maroto.

Pola súa banda, a ministra sinalou a perda de confianza na propia empresa como un dos grandes atrancos na negociación. "Creo que a sociedade e o conxunto das administracións estamos na solución, o principal escollo é a empresa que non está a facer nada, sempre estivo no negativo", subliñou.

ENCE

Feijóo tamén informou á ministra da proposta de ampliación da superficie do Porto de Marín como unha solución para encaixar a continuidade de Ence na ría de Pontevedra tras as sentenzas que anulan a prórroga para que siga en Lourizán; unha posibilidade que, como admitiu, é algo que tamén compete ao Ministerio de Transportes, Mobilidade e Axenda Urbana.

En calquera caso, Reyes Maroto comprometeuse a analizar esta formulación, da que tivo coñecemento nesta reunión, e seguirá en contacto con membros da Xunta de Galicia para poder unha resposta.

XACOBEO

Outro dos puntos que abordaron Feijóo e Maroto foi o Xacobeo. Neste contexto, o presidente galego celebrou as axudas que recibirá a Xunta, pero recriminou ao Goberno que este proxecto turístico non estea reflectido no proxecto de orzamentos xerais do Estado para 2022, que está actualmente en tramitación parlamentaria.

Con todo, Reyes Maroto reivindicou as partidas orzamentarias do seu Ministerio, que, segundo dixo, moitas se canalizarán a través de investimentos que irán a Galicia. "Fomos moi sensibles coa realidade galega", defendeu a ministra.

Así, a titular de Industria, Comercio e Turismo fixo fincapé nesta idea subliñando que hai unhas semanas inaugurouse unha oficina en Roma que promociona o Ano Xacobeo.