A volta ciclista 'O Gran Camiño' percorrerá o país entre o 24 e 27 de febreiro
Desde a Xunta confíase en chegar 2023 superando os cinco millóns de turistas,
Por Europa Press / Redacción | Santiago de Compostela | 16/11/2021 | Actualizada ás 17:23
Galicia acollerá o próximo ano a volta ciclista 'O Gran Camiño', unha iniciativa que percorrerá as catro provincias galegas da man de EZE Mosquera Events entre o 24 e o 27 de febreiro e que contará co apoio da Xunta para levar o Xacobeo 21-22 a todos os recunchos do territorio.
O vicepresidente primeiro, Alfonso Rueda, e o representante de EZE Mosquera Events, Ezequiel Mosquera, asinaron este martes un convenio de colaboración para impulsar este evento que supón a recuperación dunha proba ciclista profesional galega.
O acto tamén contou coa presenza do secretario xeral para o Deporte, José Ramón Lete, que destacou o prestixio que outorgará a Galicia unha proba ciclista deste tipo. Así apelou á clásica 'Volta a Galicia', que se celebrou entre os anos 1933 e 2000 e que en 1995 gañou o español Miguel Indurain.
O secretario xeral destacou as 33 etapas galegas da Vuelta a España nos últimos dez anos e os máis de dez mil peregrinos que realizaron o Camiño de Santiago en bicicleta no que vai de 2021. Ademais, subliñou o incremento do número de ciclistas en Galicia desde a pandemia.
Rueda tamén puxo en valor a recuperación deste evento e subliñou que "deporte e turismo unidos dan como resultado beneficios moi importantes para a economía galega".
Desde a Xunta confían no evento como escaparate do Xacobeo e de Galicia como destino seguro. Rueda celebrou que a competición se leve a cabo no mes de febreiro por coincidir co arranque do segundo Ano Santo.
Sobre as previsións de cara o próximo ano, desde a Xunta confíase en chegar 2023 superando os cinco millóns de turistas, despois dun verán no que Galicia rozou cifras de ocupación similares ás de prepandemia.
