Por E.P. | SANTIAGO DE COMPOSTELA | 16/11/2021 | Actualizada ás 19:52
A Xunta, a través de Sogama, adxudicou o contrato para a construción da nova planta de transferencia en Curtis á UTE ATE Cartago, por un importe de 1.195.361,45 euros (IVE incluído).
Diso informou a Consellería de Medio Ambiente nun comunicado, no que destaca que a futura instalación, que substituirá á microplanta que actualmente está en funcionamento neste concello coruñés, gañará en capacidade --levando ás 17.000 toneladas anuais--, eficiencia e funcionalidade.
Así, ademais de transvasar na mesma as fraccións de residuos correspondentes ao colector amarelo (envases de plástico, latas e briks) e colector xenérico (fracción resto), poderá acoller a materia orgánica recollida no seu momento a través do colector marrón.
Aínda que dará servizo inicialmente aos concellos de Sobrado dos Monxes e Vilasantar, ademais do de Curtis, estará a disposición doutros 15 municipios. Ademais, a planta incorporarase á rede de infraestruturas deseñada pola Xunta para que a maior parte dos concellos adscritos a Sogama poidan acceder á valorización dos residuos orgánicos e conten cunha instalación de biorresiduos ou de transferencia a menos de 50 quilómetros.
Neste sentido, lembrou que os entes locais dispoñen de prazo ata o 31 de decembro de 2023 para implantar a recollida diferenciada da materia orgánica a través do colector marrón e, aínda que se trata dunha competencia municipal, a Xunta axudaralles a cumprir coas súas obrigacións legais.
Para isto, habilitará unha rede conformada por catro plantas de biorresiduos --Cerceda, xa en funcionamento; Cervo; Vilanova de Arousa; e Verín-- ás que destinará un investimento de aproximadamente 38 millóns de euros, contando cun cofinanciamento dos Fondos Feder de 30 millóns.
Estas instalacións estarán apoiadas por 13 plantas de transferencia, entre elas a de Curtis, que contará cunha tolva específica para o transvasamento de lixo orgánico, que se transportará á planta de compostaxe máis próxima. Por tanto, a Xunta destacou que serán 17 as instalacións que conformarán esta infraestrutura, prevendo que entren en funcionamento a finais de 2022.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.