Feijóo insiste en que a política fiscal e laboral do Goberno é "un erro" e loa os orzamentos da Xunta
Rueda destaca o turismo como un dos motores da recuperación económica de Galicia, aproveitando a celebración do Xacobeo 21-22.
Por Europa Press / Redacción | Compostela | 17/11/2021 | Actualizada ás 18:09
O presidente da Xunta, Alberto Núñez Feijóo, reafirmouse este mércores en que a dirección da política fiscal, tributaria e de gasto público do Goberno que dirixe Pedro Sánchez, así como a que incumbe ao ámbito laboral --co foco na modificación da reforma laboral impulsada no seu día polo PP-- "é un erro".
Así o trasladou durante a súa intervención, en Santiago, no 'VII Encontro para Directivos Líderes 100 Consellos Santander 2021', no que tamén reivindicou que habería que aproveitar os fondos europeos activados pola pandemia "de forma eficiente" e "non para seguir incrementado a débeda estatal. Ao seu modo de ver, "140.000 millóns deberían ser suficientes" para iso.
Feijóo tamén defendeu as decisións adoptadas polo Executivo autonómico --como as rebaixas fiscais proxectadas para o próximo exercicio-- e remarcou que seguirá apostando "polo rigor na xestión, pola estabilidade institucional, pola concorrencia competitiva e polos incentivos á recuperación".
Ao tempo, alertou da "dobre discriminación" que podería supor a implantación da peaxe nas autovías e proclamou que a colaboración público-privada resulta "imprescindible" e é unha ferramenta básica para encarar con solvencia un escenario económico marcado polos cambios.
Feijóo aludiu ao polo para a transformación de Galicia, un conxunto de oito proxectos incluídos na candidatura galega aos fondos europeos Next Generation, que pon de manifesto a aposta da Comunidade pola transformación no ámbito da automoción, da cadea forestal, da economía circular, do medicina personalizada, da industria agroalimentaria, do naval ou da aeronáutica, coa que se aspira a "relanzar" a industria galega.
DECISIÓNS AUTONÓMICAS
No polo oposto do Goberno central, Feijóo defendeu que a Xunta está a tomar decisións "orientadas a incentivar a recuperación", entre as que destacou a aprobación duns orzamentos que contan "co maior esforzo de investimento e co menor gasto en intereses de débeda da serie histórica".
Ademais de baixar de novo os impostos: cunha rebaixa no tramo autonómico do IRPF; unha rebaixa do 10% no tipo xeral do Imposto de Transmisións Patrimoniais; unha bonificación do 25% na cota do Imposto de Patrimonio --o seu obxectivo, reiterou, é "reducilo" ata chegar a "deixalo a cero"-- ; e o mantemento do programa impostos 0 no rural, así como que o 99% dos galegos non teñan que pagar o imposto de sucesións cando herdan.
Así mesmo, referiuse a a Lei de Simplificación administrativa, para lograr a máxima axilización burocrática sen renunciar á seguridade xurídica; á Lei de Áreas Empresariais que será aprobada antes de xuño; e á Axenda de emprego de Galicia que se presentará en xuño de 2022 co obxectivo de sincronizar os perfís entre a oferta e a demanda de postos de traballo.
APOSTA POLO TURISMO
Pola súa banda, o vicepresidente primeiro da Xunta, Alfonso Rueda, quen participou este mércores na presentación do encontro, destacou que o turismo está chamado a ser un dos motores da recuperación económica de Galicia, aproveitando a celebración do Xacobeo 21-22.
Así, resaltou que a reactivación do turismo nos últimos meses avala o traballo levado a cabo durante a pandemia para apoiar ao sector con máis de 120 millóns neste ano e con medidas encamiñadas a reforzar a mensaxe de Galicia como "destino seguro, de calidade e sustentable".
Nesta liña, lembrou que neste verán a comunidade liderou a recuperación turística, con 25 puntos por encima da media respecto das cifras prepandemia de 2019, sendo a segunda autonomía con maior recuperación da demanda de noites e a terceira en número de viaxeiros respecto de 2019.
Ademais, o vicepresidente primeiro da Xunta lembrou que, co obxectivo de continuar atraendo en 2022 a turistas e peregrinos que buscan "un turismo seguro e tranquilo en contacto coa natureza", o Goberno galego porá en marcha o próximo ano o 'Plan Camiña' para seguir apoiando ao tecido turístico galego e investirá 85,5 millóns na celebración deste ano Santo dobre.
