Por Galicia Confidencial | SANTIAGO DE COMPOSTELA | 23/11/2021 | Actualizada ás 15:00
A ansiada chegada do AVE a Galicia cristaliza. Tras unha longa listaxe de executivos no Goberno central, moitas promesas levadas polo vento e datas adiadas, a alta velocidade cruzou Galicia por primeira vez o pasado luns. Pero isto non foi suficiente para calar as críticas a un sistema ferroviario que agora está no punto de mira pola "discriminación" dos traxectos galegos no tocante ao esquema de prezos.
O BNG xa denunciou xornadas atrás o feito de que o tren entre Santiago e Ourense fora "o máis caro do Estado", chegando aos 17'70€ para quen non dispoña de descontos en RENFE e sempre que se merque só unha viaxe de ida. O elevado custe deste traxecto contrasta cos primeiros billetes que se están a ofertar entre Galicia e Madrid, e que poden ser adquiridos por 15€ --cando menos a primeira remesa de 250.000 viaxes, inscrita nunha promoción--.
DE MADRID A BARCELONA POR 7 EUROS
Se ben é certo que a orografía entre Santiago e Ourense puxo dificultades á construción da liña dos trens que a cruzan, o prezo contrasta aínda máis cos traxectos lowcost que agora oferta a Renfe a través da plataforma Avlo, que ofrece viaxes de Madrid a Barcelona dende só 7 euros. Unha diferenza de prezos que xa está a xerar críticas en redes sociais e que segue tisnando o papel do administrador ferroviario na Comunidade Galega.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.