O BNG replica con humor en Twitter ao PP coa canción 'Carnaval, carnaval' de Georgie Dann

Twitter volveu a ser escenario de intercambio entre populares e nacionalistas. Así, no marco dunha rolda de prensa este venres, a conta do secretario xeral do PPdeG, Miguel Tellado, tuiteou que "o BNG non pode seguir con este entroido ideolóxico" e que "os galegos teñen dereito a que Ana Pontón lles diga a verdade: está a traballar por chegar a unha República Independente Galega? Si ou non?".

A iso, respondeu a conta oficial do BNG no Parlamento de Galicia acudindo ao humor e achegando un pequeno fragmento do afamado tema 'Carnaval, carnaval' que cantaba o recentemente falecido Georgie Dann.

"O PPdeG e Feijóo, ás voltas co seu entroido", escribiu a conta do BNG no Parlamento, lugar no que Tellado anunciou que a súa formación levará unha iniciativa co obxectivo de obrigar a que o BNG aclare "se quere a independencia" e ao PSdeG "se comparte as súas teses".