A Xunta insiste en que a Conferencia de Presidentes aborde o aumento de prazas de médicos e o Fondo Covid

O vicepresidente primeiro da Xunta, Alfonso Rueda, participou este venres na reunión preparatoria da próxima Conferencia de Presidentes autonómicos, para a cal coincidiu con outras comunidades en que se aborde a ampliación das prazas de médicos e pediatras de Atención Primaria, así como o mantemento do Fondo Covid en 2022.

No Ministerio de Política Territorial en Madrid, Rueda reclamou que o Goberno central teña "sensibilidade" e vontade de chegar a "consensos" de cara á Conferencia de Presidentes que se celebrará na illa da Palma a principios de 2022.

Iso si, o 'número dous' da Xunta xa saudou que se celebrou unha reunión preparatoria, porque "contrasta" con ocasións "anteriores" nas que era "moi difícil chegar a acordos".

Ao termo da reunión, a ministra de Política Territorial e portavoz do Goberno, Isabel Rodríguez, avanzou este venres que non está previsto que a orde do día da conferencia aborde a reforma do modelo de financiamento autonómico e o Fondo Covid, como pediran varias comunidades, e limitou o foro multilateral a tres asuntos: a cooperación en materia de Protección Civil, os fondos europeos e a reforma do Regulamento.

Rueda saudou a inclusión destes temas, pero insistiu en que quedan "no aire" outros nos que había "clamor" por parte das autonomías: a reposición do Fondo Covid, porque os gastos extraordinarios da pandemia "mantéñense"; e os "problemas sanitarios" derivados dun "deficiente sistema de previsión de prazas".

Neste contexto, reclamou o aumento de prazas de médicos e de pediatras en Atención Primaria, así como a eliminación da taxa de reposición. "Espero que polo clamor de todas as comunidades estea na orde do día", engadiu o 'número dous' da Xunta.