Establecidos os servizos mínimos durante a folga convocada para este martes no sector público galego
Son os mesmos que os fixados para o pasado 25 de outubro.
Por E.P. | SANTIAGO DE COMPOSTELA | 29/11/2021 | Actualizada ás 12:19
O Diario Oficial de Galicia (DOG) publica este luns unha orde pola que se ditan normas para garantir os servizos esenciais durante a folga convocada para este martes 30 de novembro polo sindicato Comisiones de Base (Co.bas), para todo o persoal fixo e temporal do sector público autonómico galego. O paro desenvolverase a partir das 00,00 horas deste martes e finalizará ás 23,59 do mesmo día.
A orde do DOG establece servizos mínimos respecto dos sectores e actividades cuxa regulación é competencia dalgunha das consellerías da Xunta de Galicia e que poden afectar o desenvolvemento ordinario da actividade cidadá. É dicir: sanidade, seguridade, protección civil, transportes e comunicacións, medios de comunicación social, rexistros públicos, edificios, bens e instalacións públicas, asistencia social e educación, servizos de vixilancia e extinción de incendios e bombeiros.
De feito, o DOG tamén publica este luns outra orde, neste caso da Consellería de Sanidade, pola que se determinan os servizos mínimos no ámbito da asistencia sanitaria.
Neste caso, a Xunta indica que, "ante o mantemento da situación sanitaria (mesmo cunha maior circulación detectada do virus fronte á existente durante a anterior folga)" --unha celebrada o pasado 28 de outubro--, resulta "procedente remitirse integramente aos termos da orde que determinou os servizos esenciais" aquel día.
Así, a convocatoria de folga deste martes, realizada polas organizacións Co.bas e Solidariedade Obreira, no ámbito do Servizo Galego de Saúde e as entidades públicas adscritas á Consellería de Sanidade deberá entenderse "condicionada ao mantemento dos servizos esenciais" establecidos nesta orde, que son os mesmos que os fixados o pasado 25 de outubro.
