Por E.P. | SANTIAGO DE COMPOSTELA | 02/12/2021 | Actualizada ás 19:17
O Consello da Xunta renovou este xoves o acordo coa Cruz Vermella para manter durante o primeiro semestre de 2022 o funcionamento da Tarxeta Básica, unha iniciativa posta en marcha durante os primeiros meses da pandemia para facer fronte ás necesidades máis urxentes das familias.
A Administración autonómica explicou que durante este período analizará a evolución da pandemia e os seus efectos e adaptarase a prestación ás súas variacións. En concreto, conforme destacou a Xunta, durante o último ano e medio este cartón axudou a máis de 57.000 galegos a comprar produtos de primeira necesidade de forma áxil, sinxela e sen estigmas.
Coa renovación desta medida, que continúa estando ligada ás consecuencias económicas da pandemia, búscase seguir atendendo ás familias que máis o necesitan na compra de produtos de alimentación, hixiene e farmacia.
AXUDAS A VÍTIMAS DE VIOLENCIA DE XÉNERO
Na súa reunión deste xoves, o Consello tamén aprobou a consignación de máis de 5 millóns de euros de fondos autonómicos --cifra ampliable en función das necesidades-- para facer fronte durante o 2022 e 2023 ás axudas económicas de carácter mensual, de entre 200 e 800 euros, para que as vítimas de violencia de xénero poidan gañar independencia económica respecto dos seus agresores.
A Xunta destacou que Galicia é a única comunidade que ofrece estes apoios fundamentais para que as mulleres avancen na súa recuperación, unhas axudas que poden solicitarse en calquera momento do ano.
Tamén este xoves, o Goberno galego deu luz verde a unha nova convocatoria de axudas a entidades de iniciativa social sen ánimo de lucro para levar a cabo proxectos de atención social integral dirixidos a persoas en situación de explotación sexual, preferentemente inmigrantes, e vítimas de trata de seres humanos con fins de explotación sexual.
A orde de apoios para esta 2022 conta cun orzamento de 450.000 euros, cofinanciados con cargo ao Fondo Social Europeo, o que permitirá atender as necesidades dunhas 700 persoas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.