Por E.P. | SANTIAGO DE COMPOSTELA | 09/12/2021 | Actualizada ás 12:04
Os xulgados e tribunais galegos resolveron no terceiro trimestre deste ano un total de 67.478 asuntos (254,63 de media por órgano), cifra que representa un 3% máis que no mesmo período de 2019, antes da pandemia, cando finalizaron 65.605 casos.
Así se desprende dun informe feito público este xoves pola Sección de Estatística do consello Xeral do Poder Xudicial (CGPJ) e que, segundo o Tribunal Superior de Xustiza de Galicia (TSXG), "reflicte o esforzo" que realiza o persoal da administración de xustiza de Galicia para superar a incidencia do confinamento e a supresión da actividade xudicial non esencial prol a pandemia.
Durante o terceiro trimestre deste ano a entrada de asuntos nos xulgados e os tribunais de Galicia experimentou un descenso en todas as xurisdicións. En total, ingresaron 71.894 procedementos, un 6,4% menos que o mesmo período de 2020. A taxa de litigiosidad, é dicir, o número de procedementos por cada 1.000 habitantes, situouse en 26,7, fronte aos 29,8 de media estatal.
DATOS POR XURISDICIÓNS
Na xurisdición civil, o número de casos ingresados en Galicia no terceiro trimestre do ano foi 29.826, o que supón un descenso do 7,3% respecto ao mesmo período do ano anterior. Nese tempo resolvéronse 28.305 asuntos, un 13% menos que en 2020, quedando en trámite ao final de setembro 85.251, un 5,1% menos.
Na xurisdición penal entraron 32.287 asuntos, 224,22 de media por órgano xudicial, o que supón 4,9% menos que no terceiro trimestre de 2020. O número de casos resoltos foi de 31.045; e o de asuntos en trámite ao final do período, de 38.394, un 11,1% menos que o ano pasado.
No contencioso-administrativo ingresaron 1.976 casos entre os pasados 1 de xullo e 30 de setembro, o que supón un 11,8% menos que no mesmo período do ano anterior. Resolvéronse 1.731 asuntos e quedaron en trámite 7.487 casos, practicamente os mesmos que en 2020.
Por último, a xurisdición social tamén experimentou un descenso na entrada de procedementos, xa que os 7.805 ingresados representan un 7,1% menos que no terceiro trimestre de 2020. O número de asuntos resoltos nesta foi de 6.397, un 1,8% menos, e quedaron en trámite ao final do período 28.668, un 5% menos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.