O Parlamento aproba en bloque pedir á Xunta máis recursos para as inspeccións en residencias de maiores
O deputado nacionalista Iago Tabarés defendeu que "11 inspectores son insuficientes para controlar 1.800 centros".
Por Europa Press / Redacción | SANTIAGO DE COMPOSTELA | 10/12/2021 | Actualizada ás 13:49
O Parlamento de Galicia aprobou por unanimidade durante o pleno deste venres instar á Xunta de Galicia a incrementar os recursos humanos e materiais do servizo de inspección de Política Social que posibiliten o control da normativa vixente de servizos sociais, así como velar polo respecto aos dereitos dos usuarios de residencias de maiores".
Este é un dos puntos recolleitos na Proposición Non de Lei presentada este xoves polo BNG. O resto de puntos, votados por separado, foron rexeitados cos votos do grupo popular --42--. Esta parte da iniciativa contou con 32 votos afirmativos. O deputado nacionalista Iago Tabarés presentaba este xoves ante o pleno unha iniciativa sobre o control das residencias de maiores en Ourense, na que criticou severamente a falta de recursos para as inspeccións dos servizos sociais da Xunta.
Asegurou que "11 inspectores son insuficientes para controlar 1.800 centros" --entre os de terceira idade, discapacidade e menores, entre outros--. Sinalou ademais, amparándose en informes do Consello de Contas e doutros organismos, que hai residencias nas que "hai anos que non se realiza unha inspección".
Sobre isto, lamentou que "a Xunta pague con recursos públicos ás empresas concesionarias e que non se saiba nada: se dan os servizos necesarios ou a alimentación debida, se teñen contratados aos profesionais mínimos...". Aseverou, por último, que "cando se incumpre, tampouco se sanciona" respecto dos procesos sancionadores que debe incoar o departamento autonómico cando detecta algún problema.
A este respecto, o grupo socialista instou á Xunta a "blindar os dereitos das persoas maiores" cuxo benestar corre un "risco evidente". Indicaron ademais que Galicia é a segunda comunidade con menos técnicos de inspección e, coa taxa de envellecemento que presenta a rexión, "é un cóctel molotov".
POSICIÓN DO PPdeG
Pola súa banda, os populares defenderon a xestión do Goberno autonómico asegurando que contan con 29 profesionais de inspección, máis profesional interino de apoio para tramitar expedientes sancionadores, entre outros traballadores.
Jose Alberto Pazos lamentou ademais que os deputados do BNG utilicen a súa condición de parlamentarios para "difamar a cargos e traballadores públicos co único fin de cuestionar ao Goberno", así como que "atribúan a comisión de delitos".
O popular negou que a Xunta "tape nada" e aseverou que "se se presumen indicios de delito, dáse traslado á Fiscalía, xulgado ou autoridade competente". De feito, comentou, o ano pasado o Executivo galego ordenou o peche cautelar da Vivenda Comunitaria de Burón (A Fonsagrada), que foi proposta para sanción --concretamente de 195.000 euros--.
Por último, Pazos instou a Tabarés a "trasladar" el mesmo o delito que supostamente se cometeu. "Se non, o que incumpre a Lei é vostede", afirmou. Sobre isto, o nacionalista respondeu que "se a Xunta lle dese permiso, mañá mesmo faríao", asegurando que lle corresponde á Consellería e non aos propios traballadores incoar os expedientes sancionadores.
