Alertan dun aumento de adicións ao alcol, tabaco e ludopatía coa pandemia
A Unidade de Condutas Adictivas da Coruña pide prestar máis atención á saúde mental e reclama máis recursos.
Por Europa Press / Redacción | SANTIAGO DE COMPOSTELA | 13/12/2021 | Actualizada ás 17:36
O presidente da Unidade de Tratamento de Alcol e Condutas Adictivas (Utaca) na Coruña, Ignacio Bedoya, alertou dun aumento de casos de adiccións coa pandemia, segundo expuxo coincidindo coa visita que o presidente da Deputación coruñesa, Valentín González Formoso, realizou ás instalacións.
No que vai de ano, cifrou en 669 as historicas clínicas abertas, elevándose o total a 1.300, por alcol, tabaco, ludopatía e outras adiccións. No entanto, o primeiro supón o 80% dos casos, cunha media de idade ao redor dos 35 anos das persoas atendidas e un 80% de casos de homes e o resto de mulleres.
"De recursos nunca se anda ben", dixo, a preguntas dos xornalistas, o presidente de Utaca. Segundo explicou, teñen un convenio asinado co Sergas, pero do que admitiu que "non chega para cubrir todos os gastos que debese cubrir".
Con catro profesionais que atenden ás persoas que se achegan ao centro ou que son derivadas de centros de saúde da área sanitaria, desde o mesmo demandou que por parte das autoridades sanitarias se preste aos temas de saúde mental máis atención. "Que se traballe con maior profundidade en Galicia do que se está traballando", indicou Ignacio Bedoya.
Pola súa banda, González Formoso situou a visita no obxectivo de coñecer con máis detalle o labor que realizan estas entidades e lembrou que, a través de distintos programas, o organismo provincial apoia a máis de 800 entidades sociais.
Por outra banda, a Deputación da Coruña informou este luns do apoio a 20 entidades asociativas agrarias da provincia cunha liña de axudas de 275.687 euros para financiar actividades, segundo recolle o Boletín Oficial da Provincia (BOP).
