A débeda de Galicia sitúase no 18,5% do PIB no terceiro trimestre, en "niveis prepandemia" segundo Facenda
Facenda reivindica que amplía ata 8,1 puntos o diferencial de débeda coa media autonómica.
Por E.P. | SANTIAGO DE COMPOSTELA | 14/12/2021 | Actualizada ás 17:56
A débeda de Galicia sitúase no 18,5% do seu produto interior bruto (PIB) no terceiro trimestre, isto é, seis décimas por baixo do nivel no que se atopaba no mesmo período de 2020. Así, alcanza os 11.259 millóns de euros, fronte aos 11.325 de 12 meses atrás, segundo os datos que publica este martes o Banco de España.
Así as cousas, a Consellería de Facenda reivindica que Galicia amplía ata 8,1 puntos o diferencial de débeda coa media autonómica, "o máximo histórico".
O organismo regulador "volve situar á comunidade autónoma como a terceira de réxime común con menor endebedamento de toda España", resalta. En concreto, o cociente de débeda/PIB de Galicia baixou 1,6 puntos con respecto ao segundo trimestre e sitúase no 18,5%, "en niveis prepandemia".
Ademais, Facenda destaca que Galicia tamén pechou o terceiro trimestre como a segunda comunidade con menor endebedamento por habitante de España. A débeda por habitante sitúase en 4.174 euros, fronte a 6.610 de media, apunta.
VOLUME DE DÉBEDA
Na súa análise, a consellería chama a atención sobre que Galicia é a autonomía "con menor aumento de volume de débeda desde 2008", exercicio en que comezou a tendencia ascendente.
"A redución do endebedamento nos últimos exercicios fai que Galicia estea nunha mellor posición financeira para responder as esixencias económicas derivadas dos efectos negativos do coronavirus e para poder pasar da reactivación á recuperación", engade.
