Unanimidade no Parlamento para estender a toda Galicia os cribados de cancro de cérvix

O Parlamento de Galicia insta a Xunta a completar nesta lexislatura a extensión a toda Galicia do programa de cribado de cancro de cérvix iniciado como programa piloto na área sanitaria de Lugo. A proposición non de lei defendida polo PPdeG na Comisión 5ª no Parlamento galego foi aprobada este xoves por unanimidade dos tres grupos --popular, socialista e BNG--.

A portavoz popular de sanidade, Encarna Amigo, incidiu, explicou o PPdeG nun comunicado, en que os programas de detección precoz de enfermidades "diminúen as taxas de incidencia e mortalidade en todos os grupos de idade, á vez que se incrementan as posibilidades de éxito no tratamento, aumentando así a supervivencia".

Ademais, Amigo destacou que "Galicia é a única comunidade autónoma na que se realiza un seguimento completo das lesións suxestivas de malignidade, establecendo un seguimento adecuado a cada persoa segundo o establecido nas guías europeas de calidade e, ademais, xestiónase integramente este seguimento".

HOSPITALIZACIÓN A DOMICILIO

Así mesmo, na mesma comisión parlamentaria os tres grupos aprobaron por unanimidade unha iniciativa do Grupo Socialista para pedirlle á Xunta que incorpore Rianxo ao Servizo de Hospitalización de Domicilio no primeiro trimestre do ano. A parlamentaria socialista Noa Díaz presentou unha proposición non de lei para estender o servizo a toda a área sanitaria de Santiago e Barbanza ao incorporar ao municipio de Rianxo.

Sobre esta iniciativa a portavoz popular de sanidade, Encarna Amigo, explicou que "a través da hospitalización a domicilio proporciónase no mesmo domicilio dos pacientes os coidados que recibiría no hospital, evitando estancias prolongadas nos centros hospitalarios".

O Parlamento de Galicia comprométese cos dereitos da infancia e adolescentes