Ferido tras ser atropelado polo seu vehículo ao deixalo nunha pendente sen freo de man
Non foi precisa a intervención dos medios de excarceración porque veciños puideron socorrer ao ferido
Por Europa Press / Redacción | SANTIAGO DE COMPOSTELA | 17/12/2021 | Actualizada ás 10:10
Un home resultou ferido despois de ser atropelado polo seu propio vehículo tras deixalo estacionado nunha pendente sen freo de man na noite deste pasado xoves no municipio ourensán de Riós.
Segundo informou o 112 Galicia, o home quedou entre o coche, situado nunha pendente e sen activar o freo de man, e un muro, pero non foi precisa a intervención dos medios de excarceración porque veciños puideron socorrer ao ferido.
Os feitos ocorreron sobre as 23,00 horas deste xoves. Persoal sanitario comunicou ao 112 Galicia un atropelo a un home polo seu propio vehículo en Castrelo de Cima, na praza do pobo, no concello de Riós.
Ao lugar dos feitos acudiron membros do GES da Gudiña, da Garda Civil de Tráfico e de Protección Civil da localidade. Tamén foron informados os Bombeiros de Verín, aínda que, finalmente, non foi necesario a súa intervención.
Unha vez no punto, os efectivos de Protección Civil confirmaron ao 112 Galicia o traslado do home ao Hospital de Verín por parte de persoal sanitario.
