Aprobado definitivamente o orzamento da Deputación de Pontevedra para 2022, que ascende a 179,5 millóns
Por E.P. | SANTIAGO DE COMPOSTELA | 17/12/2021 | Actualizada ás 14:30
O pleno extraordinario da Deputación de Pontevedra aprobou este venres definitivamente os orzamentos da institución provincial para o ano 2022, que se elevan ata 179,5 millóns de euros, cun crecemento dun 6,86% respecto ao anterior.
Esta cifra incrementarase ata superar os 200 millóns, por exemplo, co plan ReacPon e coa incorporación dos fondos europeos, dos que a día de hoxe están xa comprometidos uns 17 millóns.
O deputado portavoz do grupo socialista, Carlos López Font, defendeu as contas do goberno provincial "as mellores da historia" e explicou que foron desestimadas as alegacións dos sindicatos polos informes dos técnicos, xa que "non se corresponden coa administración do século XXI".
Font sostivo que desde que PSOE e BNG gobernan na Deputación convocáronse 519 prazas de persoal da administración provincial "que melloraron as condicións de traballo e que eliminaron a precariedade laboral de anteriores gobernos" e tamén "se reforzou o persoal técnico".
Tamén se rexeitaron as alegacións do grupo provincial do Partido Popular para que se incluíse a partida necesaria para renovar e mellorar o convenio dos Grupos de Emerxencias Supramunicipais (GES) para o período 2022-2024 coa Xunta.
O vicepresidente da Deputación de Pontevedra e portavoz do grupo do BNG, César Mosquera, solicitou o voto a favor do PP porque "canto antes se aprobe o orzamento antes poderanse transferir eses fondos aos concellos".
O portavoz do grupo provincial do Partido Popular, Jorge Cubela defendeu o seu "dereito a discrepar" e na súa intervención pediu "que cada un manteña a súa posición con total liberdade".
UNANIMIDADE
Por unanimidade saíu adiante a adxudicación dun expediente para a concertación dunha operación de préstamo a longo prazo con apertura dun crédito por 5 millóns de euros para o financiamento do programa ReacPon (Reacciona Pontevedra Provincia).
Igualmente solicitou o apoio de todos os grupos a concesión de subvencións do ReacPon, un programa provincial de infraestruturas e dotacións singulares para a recuperación post covid-19.
