O Consorcio de Santiago rehabilitará a fachada nobre do Pazo de Raxoi
A comisión executiva e o consello de administración aprobaron o orzamento de 2022, que ascende a case 9,2 millóns de euros.
Por E.P. | Compostela | 17/12/2021 | Actualizada ás 18:10
O Consorcio de Santiago reuniu este venres a súa comisión executiva e consello de administración para abordar o plan de obxectivos do próximo ano, o plan xeral de investimentos e o orzamento da entidade. Entre as accións máis destacadas atópase a rehabilitación da fachada nobre do Pazo de Raxoi ou o incremento de case o 47 por cento no investimento no tecido residencial, que será de 600.000 euros.
Nas reunións participaron, entre outros, o rexedor local, Xosé Sánchez Bugallo, os portavoces dos grupos municipais, o conselleiro de Facenda e Administración Pública, Miguel Corgos, e o titular de Cultura, Educación e Universidade, Román Rodríguez, entre outros representantes.
Así se aprobou o orzamento para o próximo exercicio que ascenderá a 9.171.031,69 euros, dos que As 4.555.390 achegaraos o Goberno do Estado, 2.784.413 euros a Xunta de Galicia e 1.393.264,44 euros o Concello de Santiago de Compostela.
Así mesmo, o programa de rehabilitación, mantemento e recuperación urbana contará con máis de 1,78 millóns de euros, o de dinamización cultural e turística ascenderá a 5,8 millóns, o de información estudo, interpretación e divulgación da cidade 385.219 euros e o de administración, dirección xeral, mantemento e conservación de patrimonio propio contará con 1.174.215 euros.
Unha das intervencións previstas será o inicio da rehabilitación da fachada nobre do Pazo de Raxoi, que incluirá a mellora de eficiencia enerxética do edificio, e continuarán os traballos de substitución das cubertas par evitar filtracións de auga de choiva.
Tamén se avanzará na substitución das cubertas do Palacio de Congresos e Exposicións de Galicia e na instalación da cuberta telescópica do Multiusos Fontes do Sar.
Entre outras accións, a liña de axudas do programa 'Terémanter', en materia de tecido residencial, contará con 600.000 euros, un aumento do 47% respecto deste ano e do 79% respecto de 2020.
REAL PADROADO
Doutra banda, o conselleiro de Cultura, Educación e Universidade, Román Rodríguez, trasladou os avances das propostas levadas pola Xunta ao Real Padroado do pasado mes de xullo.
Neste sentido, está a concretar a posta en marcha de proxectos como a avaliación de usos públicos en Conxo a través dun plan especial e melloras nos accesos ao Camiño de Santiago ou a rehabilitación das facultades de Medicina e de Xeografía e Historia, ente outras.
