O Sergas administrou case o 83% das doses recibidas para a poboación infantil
A inmunización en Galicia supera o 86% da poboación.
Por Europa Press / Redacción | SANTIAGO DE COMPOSTELA | 19/12/2021 | Actualizada ás 11:36
O Servizo Galego de Saúde (Sergas) leva administrado un total 49.096 doses contra a covid-19 a nenos desde que o mércores arrincou a inmunización dos menores de 12 anos. Isto implica unha adherencia do 81,83%, tendo en conta que ata o sábado estaba prevista a inoculación dun total de 60.000 vacinas infantís.
Segundo os datos actualizados este domingo pola Consellería de Sanidade no seu 'Cronómetro de vacinación' con respecto á xornada do sábado, recollidos por Europa Press, ata a data administráronse 5.570.663 doses contra o coronavirus, 33.167 delas nas últimas 24 horas. De todas elas 1.861 foron para completar pautas, polo que xa son 2.335.027 as persoas inmunizadas na Comunidade, o 86,48% da poboación total.
No que respecta á poboación infantil, ata o momento 120.870 nenos de menos de 15 anos --os datos de Sanidade non diferencian os dous grupos etarios da campaña de vacinación pautada-- recibiron polo menos unha dose, 11.458 no último día.
En concreto, na franxa de 10 a 14 anos, hai 109.976 nenos que xa contan coa primeira picada como mínimo --1.607 máis que hai un día--; mentres que entre os 5 e os 9 anos son 10.894 os vacinados, tras 9.851 doses administradas no último día. A vacinación aos menores de 12 anos arrincou o pasado mércores, 15 de decembro, tras a chegada a Galicia das primeiras 60.000 doses para esta poboación.
Desde entón, o Sergas vacinou a un total de 49.747 nenos menores de 15 anos --ao non ofrecer a web da Consellería datos desagregados por grupos etarios da campaña de vacinación--, que son o 82,91% das recibidas.
Na primeira xornada de vacinación dos nenos, o mércores 15, administráronse 12.741 doses. Na do xoves 16, de acordo cos datos ofrecidos a diario por Sanidade, se inocularon outras 12.539, mentres que na do venres 17 puxéronse 12.358. Coas 11.458 do sábado, son 49.096 en total no últimos catro días.
GRUPOS
Por grupos de poboación por vulnerabilidade hai 18.803 cidadáns de alto risco coa pauta completa; 16.781 dependentes non institucionalizados e 27.588 institucionalizados. Polo seu lado, 2.136.867 terminaron o proceso chamados pola súa idade.
Por probabilidade de exposición, 74.130 profesionais do ámbito sanitario teñen pauta completa, 27.447 do sociosanitario, e 32.758 traballadores de actividades consideradas esenciais tamén a recibiron.
As áreas sanitarias continúan en Galicia coa administración da dose de reforzo desde esta semana a cidadáns do grupo de 50 a 59 anos e proseguen con repescas para persoas maiores de 60 anos e de persoal sanitario e sociosanitario. Ademais, mantense aberta a autocita e vacinación libre para os que non se haxan inmunizado ata a data.
