Opositores e funcionarios protestarán en Santiago contra as medidas do Goberno para reducir a temporalidade
A Plataforma Turno Libre convoca unha manifestación para o sábado 15 de xaneiro.
Por Galicia Confidencial | Compostela | 22/12/2021 | Actualizada ás 21:00
Aglutinada por máis de 3.400 opositores e funcionarios de carreira, a Plataforma Turno Libre convoca para o vindeiro sábado 15 de xaneiro, ás 12 horas na Praza de Obradoiro, unha manestación para trasladar o seu "total desacordo" coas medidas acordadas polo Goberno para reducir a temporalidade no sector público.
A plataforma considera que as medidas, ademais de "ser inxustas para ambos colectivos", poderían ser inconstitucionais porque "vulneran os artigos 9.3, 23.1, 86,1 e 103 da Carta Magna, así como o artigo 21.2 da Declaración Universal de Dereitos Humanos".
Turno Libre recoñece que a temporalidade no sector público é un problema que debe ser solucionado, pero reclama que esta solución non mingüe os dereitos de todos os cidadáns a acceder de maneira xusta a un emprego público, e que garanta a calidade dos servizos públicos.
