Por Galicia Confidencial | Santiago de Compostela | 25/12/2021 | Actualizada ás 11:00
Ponte...nas ondas! estrea este próximo domingo 26 de decembro ás 20.00 horas na TVG a serie documental Meniños Cantores 2. A serie documental, incluída no libro-USB, componse de catro capítulos de 50 minutos cada un. Ao longo dos capítulos ofrécese un percorrido pola fronteira galego-portuguesa; dende Verín e Chaves ata o Océano Atlántico chegando a Viana do Castelo.
No documental, ademais de descubrir as cancións interpretadas polos nenos e nenas de 17 centros educativos e os seus padriños e madriñas, a través dos alumnos e profesores dáse a coñecer o proceso de escolla do tema musical, a súa preparación e interpretación na gravación.
Cada centro educativo, está apadriñado por un artista de Galicia e Portugal, que colaboraron na preparación e gravación dos temas musicais. Ademais, todos os padriños e madriñas gravaron o tema común "Máis perto".
O documental arranca cunha conversa en Lisboa de dous artistas que apadriñan o proxecto, Uxía e Antonio Zambujo quen cun exemplar do primeiro Meniños Cantores preguntan se agora poderán cantar nesta nova edición, de aí que o proxecto levase como nome xenérico "Agora cantamos nós", e que ten o seu sentido na interpretación por parte dos 16 artistas do "Máis perto".
No capítulo 1 percorre os concellos de Verín, Chaves e Montalegre. No capítulo 2, As Neves, Melgaço, Salvaterra de Miño e Monçao. No capítulo 3, Salceda de Caselas, Tui, Valença do Minho, Vila Nova de Cerveira e A Guarda. E por último, no capítulo 4, Tomiño, Caminha, O Rosal e Viana do Castelo.
COLABORACIÓN
A serie foi gravada entre os meses de abril e xuño pola produtora Casa de Tolos, editada por Pai Música e contou coa colaboración da TVG, o Consello da Cultura Galega e cunha axuda de O teu Xacobeo. No documental, participaron máis de 500 xoves das dúas marxes da fronteira pertencentes a 17 centros educativos, bandas de música ou grupos corais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.