Por Galicia Confidencial | Santiago de Compostela | 26/12/2021 | Actualizada ás 10:00
A mediana empresa galega comeza a mostrar preocupación polo impacto que terá o custo da enerxía no desenvolvemento dos seus negocios nos próximos meses. A pesar de que os directivos da rexión melloran as súas perspectivas por primeira vez desde o inicio da pandemia, a evolución dos prezos enerxéticos sitúase xa como unha das principais barreiras do crecemento.
En concreto, máis da metade dos empresarios de compañías mid-market (53%), considera que este factor é un dos principais freos para o crecemento dos seus negocios e para a recuperación. Unha cifra que se sitúa catro puntos por encima da media española (49%) e crece 36 puntos porcentuais respecto ao segundo semestre de 2020.
Esta é unha das conclusións do último Pulso da Mediana Empresa Española de Grant Thornton, que mide a saúde das compañías medianas do noso país e autonomías, de entre 50 e 500 empregados a partir dunha metodoloxía desenvolvida por Oxford Economics.
A firma de servizos profesionais analiza cada seis meses as perspectivas e barreiras para o crecemento percibidas por máis de 10.000 executivos de 29 países, 400 deles están en España.
En comparación con outras rexións, Galicia é a rexión onde máis creceu a inquietude por esta cuestión (+36), por encima de Andalucía (51%), Cataluña (51%), Comunidade Valenciana (43%), País Vasco (40%) e Madrid (38%).
Aínda que o 33 % dos empresarios vaticina un crecemento da empregabilidade a medio prazo, un 47% móstrase preocupado ante a falta de dispoñibilidade de man de obra cualificada para cubrir postos de traballo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.