Por Europa Press / Redacción | SANTIAGO DE COMPOSTELA | 23/12/2021 | Actualizada ás 17:39
O alcalde de Santiago, Xosé Sánchez Bugallo, recoñeceu a "incerteza" existente sobre a programación do Nadal ante o aumento de casos activos da covid, aínda que polo momento mantense tanto para fin de ano como para o día de Reis á espera do que poida pasar en próximos días.
Así, pediulle á poboación que manteña as precaucións, con especial foco nos mozos. "Os datos que temos seguen empeorando", dixo o rexedor, pero puntualizou que, "afortunadamente, hai unha certa contención en canto á hospitalización". Esta situación xera, nas súas palabras, "certa incerteza" en canto á programación do Nadal e en "como se poderá materializar".
Engade que a semana que vén tomaranse "as decisións oportunas" tanto nas medidas de seguridade que se van a esixir nas celebracións como "se houbese que tomar outras decisións". Pero a conclusión é que "de momento todo segue programado para o 31 e o cinco".
COLAS PARA PROBAS COVID
Ante a pregunta sobre as colas para facerse as probas da covid de forma gratuíta e voluntaria, o alcalde dixo que "a Consellería debería reflexionar se ese método é o máis idóneo".
Con todo, insistiu en que "hai que valorar positivamente que as persoas queiran facerse a proba", xa que é unha mostra "evidente" da concienciación que ten a cidadanía. Bugallo aproveitou para desexarlles aos composteláns que pasen unha boa Noiteboa "en compañía da súa familia e dos seus seres queridos", pero "coa prudencia necesaria".
FOCO NOS MOZOS
Ante a pregunta de se se vai a reforzar o dispositivo policial para facer fronte ás aglomeracións que se dan en lugares como Praza Roxa, Bugallo foi tallante ao expresar que "dispositivo policial hai o que hai". "Os cidadáns non podemos descargar a nosa responsabilidade nas forzas de seguridade", agregou. O alcalde engadiu que "a xente pode ser nova, pero non insensata" e que normalmente estes "adoitan ter unha certa sensación de estar fartos de tantas limitacións e de falsa seguridade".
Continuou dicindo que "en certa medida é así", xa que é o rango de idade que menos taxa de mortes e hospitalizacións ten, "pero a potencialidade transmisora é a mesma". Por iso, concluíu co aviso de que os mozos "non poden pensar só en si mesmos", pois despois van ver ás súas familias durante as vacacións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.