Por Galicia Confidencial | Compostela | 25/12/2021 | Actualizada ás 21:00
Un cento de nenos que terán que pasar ingresados o Nadal no Hospital Materno Infantil Teresa Herrera recibiron este día de Noiteboa agasallos realizados por internos do módulo 1 do Centro Penitenciario de Teixeiro. A iniciativa partiu dunha colaboración do Centro Penitenciario de Teixeiro e a Fundacion Érguete Integración, que fixo entrega dos agasallos esta mañá.
Na iniciativa, persoas internas do centro penitenciario que colaboran nos talleres ocupacionais do centro, aproveitan as súas destrezas persoais para coñecer e axudar ao seu entorno.Nesta ocasión as persoas internas empatizaron cos nenos e nenas que, como eles, pasarán estas datas afastados da súa familia. Segundo sinalou a Fundacion Érguete Integración, con estes detalles queren "mandarlles forza e colaborar, nas súas posibilidades, en animalos e que se sintan acompañados e comprendidos".
Cada cativo recibirá un adorno navideño feito en arcilla por eles e elas. Os agasallos irán acompañados cun vídeo onde as persoas internas involucradas nesta actividade explican como e porqué se implicaron nesta inicitativa.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.