A covid frea o comercio galego: "os contaxios están retraendo á xente"
O presidente da Federación Galega do Comercio di que a porcentaxe de vendas do comercio electrónico é "asombroso".
Por Europa Press / Redacción | LUGO | 28/12/2021 | Actualizada ás 11:33
O comercio galego reséntese na campaña de Nadal polo alto número de contaxios derivados da covid que se están producindo nos últimos días. Ante esa situación, o presidente da Federación Galega do Comercio, José María Seijas, subliñou que "están retraendo á xente, ao consumidor".
"Moita xente non sabe que facer, se vai ter reunións familiares ou non, e todo isto retrae as vendas. Esperamos que non volvan as restricións", desexou. Seijas confesou que depositan as súas "esperanzas para mellorar" a facturación en Reis, aínda que matiza que "a maioría das compras están realizadas xa, sexa presencialmente ou a través de internet". "Non vai ser unha campaña (a de Nadal) esaxerada, a ver se conseguimos igualar as cifras de 2019 e iso estaría ben", estimou.
En canto ao comercio electrónico, o empresario lucense sentenciou que a covid "trastornó as previsións en canto ás compras en liña".
A VENDA EN LIÑA
De tal forma que "en dous anos aceleráronse as vendas do que previamos que tiña que acontecer de aquí a cinco ou seis anos". "A xente non sabe se pode desprazarse, tamén polo elevado número de contaxios, aproveita e compra a través de internet. É algo que temos que asumir e defender este tipo de vendas do mesmo xeito que as que se producen fisicamente", advertiu.
Finalmente, Seijas constatou que a porcentaxe de vendas do comercio electrónico é "asombroso". "Véndense miles de millóns de euros a través de Internet, a maioría", sostén. "Soben máis as vendas en liña mentres que fisicamente non tanto", sinalou, a modo de conclusión, o presidente da Federación Galega do Comercio.
