13 deportistas galegos reclaman que Galicia participe en competicións internacionais

Vía Galega, dentro da campaña "Galiza, un Pobo, unha selección", vén de realizar un documental coa participación de 13 persoas relevantes e representativas do deporte galego. Nese vídeo verten a súa opinión sobre o dereito, o interese e a necesidade de poder competir representando a Galiza oficialmente e internacionalmente en todas as disciplinas deportivas.

Declaran que sería unha oportunidade moito maior para as nosas e os nosos deportistas poderen participar en competicións internacionais, xunto con manifestar o dereito a poder escoitar o himno galego no podio, ademais de ser emotivo e emocionante. 

Sinalan como Galicia no deporte é unha verdadeira potencia e referente en distintos deportes a nivel mundial na actualidade e subliñan a importancia que ten o deporte na loita pola igualdade de xénero.

Neste documental participaron referentes galegos coma: Fernando Vázquez, Caetano Horta, Xulia Vaquero, Gustavo César Veloso, Eva Castro, Luís Penín, Alba Cuba, Alexandre Sanmartín, Mercé Barrientos, Xan Rodiño, Xurxo Souto, Manuel Polo e Cristina López.